اسلام آباد: وفاقی حکومت نے ملک میں پیٹرولیم مصنوعات کی قیمتوں میں استحکام برقرار رکھنے اور عالمی منڈی میں تیل کی قیمتوں کے اتار چڑھاؤ کے اثرات کو کم کرنے کے لیے پیٹرولیم پرائس اسٹیبلائزیشن فنڈ قائم کر دیا ہے۔ اس حوالے سے وزارتِ خزانہ نے باضابطہ نوٹیفکیشن جاری کرتے ہوئے فنڈ کے قیام پر عملدرآمد کا آغاز کر دیا ہے۔
وزارتِ خزانہ کی جانب سے جاری اعلامیے کے مطابق یہ فنڈ عالمی سطح پر خام تیل کی قیمتوں میں غیر معمولی تبدیلیوں کے باعث مقامی مارکیٹ پر پڑنے والے اثرات کو متوازن رکھنے کے مقصد سے قائم کیا گیا ہے۔ حکومت کا کہنا ہے کہ اس اقدام سے مستقبل میں پیٹرولیم مصنوعات کی قیمتوں میں اچانک اضافے یا کمی کے اثرات کو بہتر انداز میں منظم کیا جا سکے گا۔
نوٹیفکیشن کے مطابق وفاقی کابینہ کے فیصلے کی روشنی میں فنڈ کے لیے ایک مخصوص سرکاری اکاؤنٹ مختص کر دیا گیا ہے، جبکہ وزارتِ خزانہ نے اس حوالے سے تمام متعلقہ وفاقی اداروں کو ضروری ہدایات بھی جاری کر دی ہیں۔
اعلامیے میں بتایا گیا ہے کہ صوبائی حکومتوں کو بھی فنڈ کی وصولی اور اس سے متعلق انتظامی امور مکمل کرنے کی ہدایت جاری کر دی گئی ہے تاکہ نظام کو مؤثر انداز میں نافذ کیا جا سکے۔
وزارتِ خزانہ نے اسٹیٹ بینک آف پاکستان سمیت دیگر متعلقہ اداروں کو بھی باضابطہ مراسلہ ارسال کر دیا ہے۔ حکام کے مطابق آئل اینڈ گیس ریگولیٹری اتھارٹی (اوگرا) اور وزارتِ خزانہ مشترکہ طور پر فنڈ کے آپریشنل طریقہ کار، مالیاتی ڈھانچے اور نفاذ کے عملی لائحہ عمل کو حتمی شکل دیں گے۔
حکومت کا مؤقف ہے کہ پیٹرولیم پرائس اسٹیبلائزیشن فنڈ کے قیام سے نہ صرف توانائی کے شعبے میں مالی استحکام کو فروغ ملے گا بلکہ عالمی منڈی میں قیمتوں کے غیر متوقع اتار چڑھاؤ کے اثرات سے صارفین اور معیشت کو بھی بہتر تحفظ فراہم کیا جا سکے گا۔
