آئل اینڈ گیس ریگولیٹری اتھارٹی (اوگرا) نے وفاقی حکومت کی پالیسی گائیڈ لائنز کے مطابق جون 2026 کے لیے ری گیسیفائیڈ لیکوئڈ نیچرل گیس (RLNG) کی نئی قیمتوں کا اعلان کر دیا ہے، جن کا اطلاق یکم جون 2026 سے ہوگا۔
اوگرا کی جانب سے جاری نوٹیفکیشن کے مطابق ایس این جی پی ایل (SNGPL) کے لیے آر ایل این جی کا ٹرانسمیشن ریٹ 17.9394 امریکی ڈالر فی ایم ایم بی ٹی یو جبکہ ڈسٹری بیوشن ریٹ 19.5228 امریکی ڈالر فی ایم ایم بی ٹی یو مقرر کیا گیا ہے۔
اسی طرح ایس ایس جی سی ایل (SSGC) کے لیے ٹرانسمیشن ریٹ 16.3679 امریکی ڈالر فی ایم ایم بی ٹی یو اور ڈسٹری بیوشن ریٹ 18.6360 امریکی ڈالر فی ایم ایم بی ٹی یو مقرر کیا گیا ہے۔
اوگرا کے مطابق مئی 2026 کے مقابلے میں ایس این جی پی ایل کے ٹرانسمیشن ریٹ میں 2.3157 امریکی ڈالر فی ایم ایم بی ٹی یو یا 14.82 فیصد جبکہ ڈسٹری بیوشن ریٹ میں 2.5381 امریکی ڈالر فی ایم ایم بی ٹی یو یا 14.94 فیصد اضافہ کیا گیا ہے۔
دوسری جانب ایس ایس جی سی ایل کے ٹرانسمیشن ریٹ میں 2.2748 امریکی ڈالر فی ایم ایم بی ٹی یو یا 16.14 فیصد اور ڈسٹری بیوشن ریٹ میں 2.5934 امریکی ڈالر فی ایم ایم بی ٹی یو یا 16.17 فیصد اضافہ ریکارڈ کیا گیا ہے۔
اوگرا کے ترجمان کے مطابق جون 2026 کے لیے آر ایل این جی کی قیمتوں کا تعین پاکستان اسٹیٹ آئل (PSO) کے درآمد کردہ تین ایل این جی کارگو اور پاکستان ایل این جی لمیٹڈ (PLL) کے ایک اسپاٹ کارگو کی بنیاد پر کیا گیا ہے۔
ترجمان نے مزید بتایا کہ آر ایل این جی کی نئی قیمتوں کا مکمل نوٹیفکیشن اوگرا کی سرکاری ویب سائٹ پر بھی دستیاب ہے۔
