سعودی عرب کے مشرقی شہر راس تنورہ میں سعودی آئل کمپنی آرامکو کا ایک ہیلی کاپٹر گر کر تباہ ہوگیا، جس کے نتیجے میں سوار تمام 14 افراد جاں بحق ہوگئے۔
سعودی وزارتِ توانائی کی جانب سے جاری بیان کے مطابق حادثہ آرامکو کے آپریشنز سے وابستہ ہیلی کاپٹر کو پیش آیا۔ ابتدائی اطلاعات کے مطابق ہیلی کاپٹر حادثے میں 14 مسافروں کی جان چلی گئی جبکہ جاں بحق ہونے والے تمام افراد سعودی شہری تھے۔
وزارتِ توانائی نے حادثے پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی ہے۔ حکام کے مطابق حادثے کی وجوہات جاننے کے لیے متعلقہ اداروں نے تحقیقات کا آغاز کر دیا ہے۔
تاحال یہ واضح نہیں کیا گیا کہ ہیلی کاپٹر تکنیکی خرابی، خراب موسمی حالات یا کسی اور وجہ سے حادثے کا شکار ہوا۔ تحقیقاتی ٹیمیں جائے وقوعہ سے شواہد اکٹھے کر رہی ہیں اور مکمل تحقیقات کے بعد ہی حادثے کی اصل وجہ سامنے آئے گی۔
راس تنورہ سعودی عرب کی اہم تیل برآمدی تنصیبات میں شمار ہوتا ہے، جہاں آرامکو کے بڑے صنعتی اور لاجسٹک آپریشنز جاری رہتے ہیں۔ ہیلی کاپٹر حادثے کے بعد متعلقہ حکام نے حفاظتی اقدامات مزید سخت کرنے اور فضائی آپریشنز کا جائزہ لینے کا بھی فیصلہ کیا ہے۔
