ایران کی قومی فٹبال ٹیم نے فیفا ورلڈ کپ 2026 کے گروپ جی میں بیلجیئم کے خلاف میچ کے بعد امریکا میں اپنے قیام کے اختتام پر ایک منفرد اور جذباتی پیغام چھوڑا، جس نے سوشل میڈیا پر خاصی توجہ حاصل کی۔
لاس اینجلس میں کھیلے گئے میچ کے بعد ایرانی ٹیم کے ڈریسنگ روم سے ہاتھ سے لکھا گیا ایک پیغام سامنے آیا جس میں میزبان شہر اور وہاں کے عوام کی مہمان نوازی کو سراہتے ہوئے اظہارِ تشکر کیا گیا۔
پیغام میں کہا گیا کہ "لاس اینجلس، آپ کی مہمان نوازی کا شکریہ۔ ہم فخر کے ساتھ یہاں آئے، عزت اور وقار کے ساتھ مقابلہ کیا اور سربلندی کے ساتھ واپس جا رہے ہیں۔”
ایرانی ٹیم نے اپنے پیغام میں ہزاروں سالہ فارسی تہذیب اور جدید ایران کی شناخت کا حوالہ دیتے ہوئے کہا کہ ان کے ملک کی روح ہمیشہ مضبوط اور ثابت قدم رہی ہے۔
ڈریسنگ روم میں چھوڑے گئے اس نوٹ میں ان ہزاروں ایرانی شائقین کا بھی خصوصی شکریہ ادا کیا گیا جنہوں نے لاس اینجلس میں کھیلے گئے دونوں میچوں کے دوران ٹیم کی بھرپور حمایت کی۔ ٹیم نے مختلف قوموں کے درمیان امن، باہمی احترام اور دوستی کے فروغ کے لیے نیک تمناؤں کا اظہار بھی کیا۔
یاد رہے کہ ایران نے گروپ جی کے اپنے دونوں میچ امریکا کے شہر لاس اینجلس میں کھیلے۔ ہر میچ کے بعد ایرانی اسکواڈ اپنے میکسیکو میں قائم بیس کیمپ واپس جاتا رہا۔ امریکی سفری پابندیوں کے باعث ایرانی وفد کے بعض عہدیداروں اور معاون عملے کے ارکان کو امریکا میں داخلے کی اجازت نہیں دی گئی تھی۔
ایرانی ٹیم کا یہ پیغام ایسے وقت سامنے آیا ہے جب سیاسی کشیدگی کے باوجود کھیل کے میدان میں مثبت رویے، احترام اور عوامی سطح پر روابط کو اہمیت دی جا رہی ہے۔ سوشل میڈیا صارفین نے بھی اس اقدام کو کھیل کی حقیقی روح اور بین الاقوامی ہم آہنگی کی ایک خوبصورت مثال قرار دیا۔
