پاکستان ہاکی ٹیم کے تمام واجبات کلیئر، کھلاڑیوں کو ایونٹ سے پہلے انعامی رقم اور الاؤنسز مل گئے

لاہور: پاکستان ہاکی فیڈریشن (پی ایچ ایف) نے قومی ہاکی ٹیم کے کھلاڑیوں کو مجموعی طور پر 4 کروڑ 50 لاکھ روپے کی ادائیگی کر دی ہے، جو پاکستانی ہاکی کی تاریخ میں ایک اہم پیش رفت قرار دی جا رہی ہے۔

پی ایچ ایف کے مطابق ایف آئی ایچ پرو لیگ میں شرکت کے لیے قومی ٹیم کی روانگی سے قبل تمام کھلاڑیوں کے واجبات مکمل طور پر ادا کر دیے گئے ہیں۔ ادا کی جانے والی رقم میں وزیرِ اعظم شہباز شریف کی جانب سے ایف آئی ایچ ہاکی ورلڈ کپ کے لیے کوالیفائی کرنے پر اعلان کردہ انعامی رقم اور پرو لیگ کے لیے ایڈوانس ڈیلی الاؤنس شامل ہیں۔

پاکستان ہاکی فیڈریشن کا کہنا ہے کہ پہلی مرتبہ ایسا ہوا ہے کہ کسی بین الاقوامی ایونٹ میں شرکت سے قبل قومی ٹیم کے تمام کھلاڑیوں کو ان کے واجبات اور مراعات کی مکمل ادائیگی پیشگی بنیادوں پر کر دی گئی ہے۔

پی ایچ ایف کے سربراہ محی الدین وانی کے مطابق ہر کھلاڑی کو پرو لیگ کی مد میں تقریباً 7 لاکھ روپے جبکہ ایف آئی ایچ ہاکی ورلڈ کپ کے لیے کوالیفائی کرنے پر 15 لاکھ روپے ادا کیے گئے ہیں۔ اس کے علاوہ کھلاڑیوں کو روزانہ الاؤنس کی مد میں 110 امریکی ڈالر فی کس بھی فراہم کیے گئے ہیں۔

انہوں نے کہا کہ فیڈریشن کی کوشش ہے کہ قومی کھلاڑی مالی پریشانیوں سے آزاد ہو کر مکمل توجہ اپنی کارکردگی پر مرکوز رکھ سکیں اور بین الاقوامی مقابلوں میں پاکستان کا نام روشن کریں۔

پاکستان ہاکی ٹیم 13 سے 20 جون تک بیلجیئم میں ایف آئی ایچ پرو لیگ کے تحت میزبان بیلجیئم اور اسپین کے خلاف چار میچز کھیلے گی۔ اس کے بعد قومی ٹیم 23 سے 27 جون تک انگلینڈ میں بھارت اور انگلینڈ کے خلاف مزید چار میچز میں حصہ لے گی۔

پرو لیگ مہم کے بعد قومی ٹیم 14 سے 30 اگست تک نیدرلینڈز اور بیلجیئم میں منعقد ہونے والے ایف آئی ایچ ہاکی ورلڈ کپ میں شرکت کرے گی، جہاں پاکستان عالمی سطح پر اپنی صلاحیتوں کا مظاہرہ کرے گا۔