لاہور میں پاکستان اور آسٹریلیا کے درمیان جاری ون ڈے سیریز کا فیصلہ کن مقابلہ آج کھیلا جا رہا ہے، جہاں آسٹریلوی کپتان نے ٹاس جیت کر پہلے بیٹنگ کرنے کا فیصلہ کیا ہے۔
میچ سے قبل لاہور میں بارش اور آندھی کے باعث انتظامات متاثر ہوئے جس کے نتیجے میں ٹاس مقررہ وقت سے 15 منٹ تاخیر کے بعد شام 4 بج کر 15 منٹ پر ہوا۔ حکام کے مطابق میچ کا آغاز شام 4 بج کر 45 منٹ پر ہوگا۔
پاکستانی ٹیم مینجمنٹ نے فیصلہ کن مقابلے کے لیے اپنی فاتح کمبی نیشن برقرار رکھتے ہوئے اسکواڈ میں کوئی تبدیلی نہیں کی۔ دوسری جانب آسٹریلیا نے پلیئنگ الیون میں ایک تبدیلی کرتے ہوئے تنویر سنگھا کی جگہ کوپر کونولی کو شامل کیا ہے۔
دونوں ٹیموں کے درمیان یہ مقابلہ سیریز کے فاتح کا فیصلہ کرے گا، جس کے باعث شائقین کرکٹ کی دلچسپی اپنے عروج پر پہنچ چکی ہے۔ ماضی کے اعداد و شمار پاکستان کے حق میں دکھائی دیتے ہیں، کیونکہ پاکستان اور آسٹریلیا کے درمیان ون ڈے سیریز میں پانچ مرتبہ ایسا موقع آیا جب آخری میچ فیصلہ کن ثابت ہوا، اور ان میں سے چار مرتبہ پاکستان نے کامیابی حاصل کی۔
کرکٹ ماہرین کے مطابق ہوم گراؤنڈ، مقامی کنڈیشنز اور شائقین کی بھرپور حمایت پاکستان کے لیے اہم عوامل ثابت ہو سکتے ہیں، جبکہ آسٹریلیا اپنی مضبوط بیٹنگ لائن اور جارحانہ انداز کے ساتھ میدان میں اترے گا۔
فیصلہ کن میچ میں دونوں ٹیموں کی نظریں سیریز اپنے نام کرنے پر مرکوز ہیں، جس کے باعث ایک سنسنی خیز اور سخت مقابلے کی توقع کی جا رہی ہے۔
