پاکستان کرکٹ بورڈ (پی سی بی) نے اعلان کیا ہے کہ جنوبی افریقا ویمنز انڈر 19 ٹیم پہلی مرتبہ پاکستان کا دورہ کرے گی، جہاں دونوں ٹیموں کے درمیان پانچ ٹی 20 میچز کی سیریز کھیلی جائے گی۔
پی سی بی کے مطابق یہ سیریز 14 سے 24 جولائی تک کراچی کے نیشنل بینک اسٹیڈیم میں منعقد ہوگی۔ جنوبی افریقا ویمنز انڈر 19 ٹیم 10 جولائی کو کراچی پہنچے گی، جبکہ دونوں ٹیمیں 11 سے 13 جولائی تک ٹریننگ سیشنز میں حصہ لیں گی۔
سیریز کے پانچوں ٹی 20 میچز 14، 17، 19، 22 اور 24 جولائی کو کھیلے جائیں گے۔ تمام مقابلے نیشنل بینک اسٹیڈیم کراچی میں ہوں گے۔
پاکستان کرکٹ بورڈ کا کہنا ہے کہ یہ سیریز اے سی سی ویمنز ٹی 20 ایشیا کپ اور آئی سی سی ویمنز انڈر 19 ٹی 20 ورلڈ کپ کی تیاریوں کے لیے اہم ثابت ہوگی اور نوجوان کھلاڑیوں کو بین الاقوامی سطح پر اپنی صلاحیتوں کے اظہار کا موقع فراہم کرے گی۔
پی سی بی ویمنز کرکٹ ڈیپارٹمنٹ کی جانب سے حال ہی میں کراچی میں انڈر 19 کھلاڑیوں کے لیے خصوصی تربیتی کیمپ کا بھی انعقاد کیا گیا تھا، جس کا مقصد نوجوان کھلاڑیوں کی تکنیکی اور ذہنی صلاحیتوں کو مزید نکھارنا تھا۔
جنوبی افریقا ویمنز انڈر 19 ٹیم کا یہ دورہ دونوں ممالک کے درمیان خواتین کی کرکٹ کے فروغ اور باہمی کھیلوں کے تعلقات کو مضبوط بنانے کی جانب ایک اہم پیش رفت قرار دیا جا رہا ہے۔
