فیفا ورلڈ کپ 2026 کے دوسرے سیمی فائنل میں دفاعی چیمپئن ارجنٹینا نے سنسنی خیز مقابلے کے بعد انگلینڈ کو 2-1 سے شکست دے کر فائنل کے لیے کوالیفائی کر لیا، جہاں اس کا مقابلہ اسپین سے ہوگا۔
اٹلانٹا اسٹیڈیم میں کھیلے گئے میچ کا آغاز دونوں ٹیموں کے جارحانہ انداز سے ہوا۔ پہلے ہاف میں دونوں جانب سے متعدد حملے کیے گئے، تاہم کوئی بھی ٹیم گول کرنے میں کامیاب نہ ہو سکی اور وقفے تک مقابلہ بغیر کسی گول کے برابر رہا۔
دوسرے ہاف میں انگلینڈ نے 55ویں منٹ میں گورڈن کے گول کی بدولت برتری حاصل کر لی، جس کے بعد ایسا محسوس ہونے لگا کہ انگلش ٹیم تقریباً 60 برس بعد ورلڈ کپ فائنل میں پہنچنے کا خواب پورا کر لے گی۔
تاہم ارجنٹینا نے آخری لمحات میں شاندار واپسی کرتے ہوئے میچ کا رخ بدل دیا۔ 85ویں منٹ میں فرنانڈس نے گول کر کے مقابلہ 1-1 سے برابر کر دیا، جبکہ انجری ٹائم کے دوسرے منٹ میں مارٹینز نے فیصلہ کن گول اسکور کر کے ارجنٹینا کو 2-1 کی فتح دلا دی۔
اس شکست کے ساتھ انگلینڈ کا کئی دہائیوں بعد ورلڈ کپ فائنل کھیلنے کا خواب ادھورا رہ گیا، جبکہ ارجنٹینا نے مسلسل عمدہ کارکردگی کا مظاہرہ کرتے ہوئے فیصلہ کن معرکے میں اپنی جگہ پکی کر لی۔
اب فیفا ورلڈ کپ 2026 کے فائنل میں اتوار کی شب اسپین اور ارجنٹینا آمنے سامنے ہوں گے، جبکہ فرانس اور انگلینڈ ہفتے کے روز تیسری پوزیشن کے میچ میں مدمقابل ہوں گے۔
یہ ارجنٹینا کی تاریخ میں ساتویں مرتبہ ورلڈ کپ فائنل میں رسائی ہے۔ ارجنٹائن اس سے قبل تین مرتبہ عالمی چیمپئن اور تین مرتبہ رنر اپ رہ چکا ہے، جبکہ اب وہ چوتھا عالمی ٹائٹل جیتنے کے لیے اسپین کا سامنا کرے گا۔
