چین نے ایران اور امریکا کے درمیان بڑھتی ہوئی کشیدگی پر گہری تشویش کا اظہار کرتے ہوئے تمام متعلقہ فریقوں پر زور دیا ہے کہ وہ تحمل کا مظاہرہ کریں اور خطے میں صورتحال کو مزید بگڑنے سے بچائیں۔امریکہ، ایران اور اسرائیل اپنے اختلافات کو سفارتی ذرائع اور مذاکرات کے ذریعے حل کریں اور ایسے اقدامات سے گریز کریں جو خطے میں کشیدگی اور عدم استحکام کو مزید بڑھا سکتے ہیں۔
چینی وزارت خارجہ کے ترجمان کی جانب سے جاری بیان میں کہا گیا کہ موجودہ حالات نہ صرف مشرقِ وسطیٰ بلکہ عالمی امن و استحکام کے لیے بھی اہمیت رکھتے ہیں، اس لیے تمام فریقین کو ذمہ دارانہ طرزِ عمل اختیار کرنا چاہیے۔
چین نے یہ بھی واضح کیا کہ وہ مشرقِ وسطیٰ میں کشیدگی کم کرنے، مذاکرات کے فروغ اور تنازعات کے پرامن حل کی حمایت جاری رکھے گا۔ بیجنگ کا کہنا ہے کہ موجودہ حالات میں تحمل اور سفارت کاری ہی خطے کو مزید بحران سے بچا سکتی ہے۔
چینی وزارت خارجہ نے اس بات پر زور دیا کہ طاقت کے استعمال یا فوجی تصادم کے بجائے سیاسی اور سفارتی ذرائع ہی دیرپا حل کا راستہ فراہم کر سکتے ہیں۔ ترجمان نے تمام فریقین سے اپیل کی کہ وہ خطے میں امن، استحکام اور سلامتی کو اولین ترجیح دیں۔
تجزیہ کاروں کے مطابق چین کا یہ بیان ایسے وقت سامنے آیا ہے جب ایران اور امریکا کے درمیان حالیہ فوجی اور سیاسی تناؤ نے عالمی برادری کو تشویش میں مبتلا کر رکھا ہے، جبکہ مختلف ممالک فریقین کو مذاکرات کی میز پر واپس لانے کی کوششیں کر رہے ہیں۔
