واشنگٹن: امریکی صدر ڈونلڈ ٹرمپ نے ایران کے خلاف سخت لہجہ اختیار کرتے ہوئے کہا ہے کہ تہران نے معاہدے کے لیے مذاکرات میں بہت زیادہ تاخیر کی اور اب اسے اس فیصلے کی قیمت ادا کرنا پڑے گی۔
ٹرمپ نے مزید کہا کہ ایران کو مکمل شکست کا سامنا کرنا پڑا ہے، تاہم اس کے باوجود ایرانی قیادت اب بھی صرف بیانات اور دعووں تک محدود ہے۔ انہوں نے الزام عائد کیا کہ تہران عملی اقدامات کے بجائے محض گفتگو پر اکتفا کر رہا ہے۔
سوشل میڈیا پر جاری اپنے بیان میں امریکی صدر نے دعویٰ کیا کہ ایران کی فوجی طاقت بری طرح متاثر ہو چکی ہے اور اس کے متعدد اہم دفاعی شعبے عملی طور پر ناکارہ ہو گئے ہیں۔ ان کا کہنا تھا کہ ایران کی بحریہ اور فضائیہ کے بڑے حصے اب مؤثر انداز میں کام کرنے کے قابل نہیں رہے۔
ٹرمپ کے حالیہ بیانات ایسے وقت میں سامنے آئے ہیں جب خطے میں ایران، امریکا اور اسرائیل کے درمیان کشیدگی مسلسل عالمی توجہ کا مرکز بنی ہوئی ہے۔ ایران اور امریکا کے درمیان ممکنہ سفارتی معاہدے اور سیکیورٹی صورتحال کے حوالے سے مختلف دعوے اور جوابی بیانات بھی جاری ہیں۔
امریکی صدر نے اپنے پیغام میں ایران کو مشرقِ وسطیٰ کا "غنڈہ” قرار دیتے ہوئے کہا کہ اگر ایران نے بروقت مذاکرات مکمل کیے ہوتے تو اس کے لیے ایک بہتر معاہدہ ممکن تھا، لیکن اب حالات تبدیل ہو چکے ہیں۔
سیاسی مبصرین کے مطابق ٹرمپ کا یہ بیان خطے میں جاری سفارتی اور عسکری تناؤ کے تناظر میں اہمیت رکھتا ہے، تاہم ایرانی حکام کی جانب سے اس بیان پر باضابطہ ردعمل سامنے آنا ابھی باقی ہے۔
