آئل اینڈ گیس ڈیولپمنٹ کمپنی لمیٹڈ (Oil and Gas Development Company Limited) نے سندھ کے ضلع سانگھڑ میں تیل اور گیس کے نئے ذخائر دریافت کرنے کا اعلان کیا ہے، جسے ملکی توانائی کے شعبے میں ایک اہم پیش رفت قرار دیا جا رہا ہے۔
ترجمان او جی ڈی سی ایل کے مطابق بوبی ڈیپ ون کنویں سے یومیہ تقریباً 2 ہزار بیرل خام تیل اور 1.1 ایم ایم ایس سی ایف ڈی گیس حاصل ہونے کی توقع ہے۔
ترجمان کا کہنا ہے کہ اس نئی دریافت سے نہ صرف ملکی ہائیڈروکاربن پیداوار میں اضافہ ہوگا بلکہ علاقے میں مزید تلاش کے امکانات بھی روشن ہو گئے ہیں۔
او جی ڈی سی ایل کے مطابق یہ پیش رفت پاکستان کی توانائی ضروریات کو پورا کرنے، درآمدی ایندھن پر انحصار کم کرنے اور ملک کے امپورٹ بل میں کمی لانے میں معاون ثابت ہوگی۔
ماہرین کے مطابق مقامی سطح پر تیل و گیس کی دریافتیں ملکی معیشت کے لیے مثبت اشارہ ہیں اور توانائی کے شعبے میں خود کفالت کی جانب اہم قدم ہیں۔
