کوئٹہ: بلوچستان کے دارالحکومت کوئٹہ کے علاقے سریاب میں دھماکا خیز مواد پھٹنے سے دو کمسن بچے جاں بحق جبکہ ایک بچہ زخمی ہوگیا۔ واقعے کے بعد پولیس اور امدادی ٹیمیں فوری طور پر جائے وقوعہ پر پہنچ گئیں اور متاثرین کو اسپتال منتقل کردیا گیا۔
پولیس حکام کے مطابق افسوسناک واقعہ سریاب کے علاقے کیچی بیگ کی کلی جدید میاں خان میں پیش آیا، جہاں بچے ایک خالی پلاٹ میں کھیل رہے تھے۔ ابتدائی اطلاعات کے مطابق بچوں کو ایک مشتبہ دھماکا خیز شے ملی جسے وہ کھلونا سمجھ کر چھیڑ رہے تھے کہ اچانک زوردار دھماکا ہوگیا۔
ایس پی سریاب نے بتایا کہ دھماکے کے نتیجے میں دو بچے موقع پر ہی جاں بحق ہوگئے، جبکہ ایک بچہ شدید زخمی ہوا جسے فوری طور پر اسپتال منتقل کر دیا گیا، جہاں اسے طبی امداد فراہم کی جا رہی ہے۔
پولیس کے مطابق جاں بحق بچوں کی لاشیں ضروری قانونی کارروائی کے لیے اسپتال منتقل کر دی گئی ہیں، جبکہ جائے وقوعہ کو گھیرے میں لے کر شواہد اکٹھے کیے جا رہے ہیں۔
قانون نافذ کرنے والے اداروں نے واقعے کی مکمل تحقیقات کا آغاز کر دیا ہے تاکہ یہ معلوم کیا جا سکے کہ دھماکا خیز مواد وہاں کیسے پہنچا اور اس کی نوعیت کیا تھی۔ بم ڈسپوزل اسکواڈ بھی علاقے کا معائنہ کر رہا ہے تاکہ مزید کسی خطرناک مواد کی موجودگی کو یقینی بنایا جا سکے۔
حکام نے شہریوں، خصوصاً والدین سے اپیل کی ہے کہ بچوں کو غیر شناخت شدہ یا مشتبہ اشیاء سے دور رکھیں اور ایسی کسی بھی چیز کی صورت میں فوری طور پر پولیس یا متعلقہ اداروں کو اطلاع دیں۔
