معروف بھارتی گلوکار اور ریپر Badshah (آدتیہ پرتیک سنگھ سسودیا) کے نائٹ کلب ’’ساگو بائے بادشاہ‘‘ کو بلڈنگ قوانین کی خلاف ورزیوں کے باعث انتظامیہ نے سیل کر دیا ہے۔
بھارتی میڈیا رپورٹس کے مطابق چندی گڑھ میں واقع نائٹ کلب کے خلاف کارروائی شہر کی انتظامیہ کے انفورسمنٹ ونگ نے کی۔ حکام کا کہنا ہے کہ کلب کی نچلی اور دوسری منزل پر بڑے پیمانے پر غیر مجاز تعمیرات کی گئی تھیں، جو منظور شدہ نقشے اور تعمیراتی ضوابط کے خلاف تھیں۔
رپورٹس کے مطابق انسپیکشن کے دوران معلوم ہوا کہ کلب کے اندر مختلف کیبنز اور پارٹیشنز تعمیر کیے گئے تھے جبکہ اضافی واش رومز اور کچن بھی تعمیر کیے گئے۔ اس کے علاوہ ٹن شیڈز کی تنصیب، اضافی اسٹوریج ایریاز کی تعمیر اور عمارت کے منظور شدہ بلڈنگ پلان میں متعدد تبدیلیاں بھی کی گئی تھیں۔
انتظامیہ کی جانب سے جاری تفصیلات کے مطابق عمارت کے پچھلے حصے میں بھی غیر منظور شدہ تبدیلیاں کی گئی تھیں، جنہیں معائنے کے دوران خلاف ورزیوں کی فہرست میں شامل کیا گیا۔
حکام کا کہنا ہے کہ متعدد نوٹسز اور ضابطہ جاتی کارروائیوں کے باوجود قوانین کی مکمل پاسداری نہ ہونے پر نائٹ کلب کو سیل کرنے کا فیصلہ کیا گیا۔
واضح رہے کہ ’’ساگو بائے بادشاہ‘‘ چندی گڑھ کے معروف نائٹ کلبز میں شمار ہوتا ہے اور اس کا تعلق بالی ووڈ اور میوزک انڈسٹری کے معروف ریپر بادشاہ سے ہے، جو متعدد سپر ہٹ گانوں کے باعث جنوبی ایشیا میں مقبولیت رکھتے ہیں۔
