پاکستان اور روس باہمی اعتماد اور دوستی میں بندھے ہوئے ہیں، وفاقی وزیر صحت مختار احمد ۔ ماسکو کندھے سے کندھا ملا کر کھڑا ہے، سفیر گلیب شوپن

وفاقی وزیر صحت مختار احمد نے کہا ہے کہ پاکستان اور روس باہمی تعاون، اعتماد اور دوستی کے مضبوط رشتے میں بندھے ہوئے ہیں، جو وقت کے ساتھ مزید مستحکم ہو رہے ہیں۔

روسی سفارت کار گلیب شوپن نے پاکستان اور روس کے درمیان دوستانہ تعلقات کے فروغ میں ایسوسی ایشن کی خدمات کو سراہتے ہوئے مکمل تعاون کی یقین دہانی کرائی۔ ان کا کہنا تھا کہ روس پاکستان کے ساتھ “کندھے سے کندھا ملا کر” کھڑا ہے۔

ان خیالات کا اظہار انہوں نے روس اور سی آئی ایس ممالک سے پاکستانی گریجویٹس کی ایسوسی ایشن کی 25ویں سالگرہ کے موقع پر منعقدہ سابق طلباء کے اجلاس سے خطاب کرتے ہوئے کیا۔

وفاقی وزیر صحت نے کہا کہ پاکستانی نوجوان روس میں مختلف شعبوں میں اعلیٰ تعلیم حاصل کر کے وطن واپس آتے ہیں اور ملک کی ترقی میں اہم کردار ادا کرتے ہیں۔ ان کے مطابق پاکستان روس کے علم، ٹیکنالوجی، مہارت اور تجربے سے بھرپور فائدہ اٹھا سکتا ہے۔

وزیر نے کہا کہ روس میں اعلیٰ تعلیم حاصل کرنے والے پاکستانی طلباء پیشہ ورانہ علم اور تجربے کے ساتھ وطن واپسی کے بعد ملک میں مثبت کردار ادا کر رہے ہیں۔

انہوں نے کہا کہ پاکستان روس کے علم، مہارت، ٹیکنالوجی اور تجربے سے بہت فائدہ اٹھا سکتا ہے، انہوں نے مزید کہا کہ ایسوسی ایشن نے دونوں ممالک کے درمیان دوطرفہ تعلقات کو مضبوط بنانے میں اہم کردار ادا کیا ہے۔

تقریب سے پاکستانی گریجویٹس کی ایسوسی ایشن کے چئیرمین ڈاکٹر شاہد حسن، صدر ڈاکٹر اشرف نظامی، پاکستان میں تعینات روسی سفارت کار گلیب شوپن، شعبہ خارجہ کی ڈین، رشین فرینڈ شپ یونیورسٹی، ماسکو محترمہ انارہ، سری لنکا طلباء کے سابق صدر بدھا پریا رمانہ، ڈاکٹر نجم السحر بٹ، ڈاکٹر ندیم احمد بھٹی، امجد حسین رضوی، حسنین مرزا اور ڈاکٹر مصدق حسین نے بھی خطاب کیا۔

ایسوسی ایشن کے چیئرمین ڈاکٹر شاہد حسن نے کہا کہ تقریب میں پاکستان اور بیرون ملک سے فارغ التحصیل طلباء نے بڑی تعداد میں شرکت کی، جو مختلف شعبوں میں ملک و قوم کی خدمت کر رہے ہیں۔