اسلام آباد: وزیراعظم محمد شہباز شریف نے امریکا کے 250ویں یومِ آزادی کے موقع پر امریکی صدر ڈونلڈ ٹرمپ اور امریکی عوام کو دلی مبارکباد پیش کرتے ہوئے پاکستان اور امریکا کے درمیان دیرینہ تعلقات کو مزید مضبوط بنانے کے عزم کا اعادہ کیا ہے۔
وزیراعظم نے اپنے تہنیتی پیغام میں کہا کہ پاکستان پائیدار جمہوری اقدار اور آزادی کی مشترکہ روایات کی خوشی میں امریکی عوام کے ساتھ شریک ہے۔ انہوں نے کہا کہ پاکستان اور امریکا کے درمیان سات دہائیوں سے زائد عرصے پر محیط تعلقات باہمی احترام، تعاون اور مشترکہ مفادات پر مبنی ہیں۔
شہباز شریف نے کہا کہ پاکستانی نژاد امریکی برادری دونوں ممالک کے درمیان دوستی اور تعاون کو فروغ دینے میں اہم کردار ادا کر رہی ہے اور اس کمیونٹی نے پاک امریکا تعلقات کو مزید مستحکم بنانے میں قابلِ قدر خدمات انجام دی ہیں۔
وزیراعظم نے عالمی امن اور علاقائی استحکام کے حوالے سے دونوں ممالک کے تعاون کا ذکر کرتے ہوئے کہا کہ پاکستان اور امریکا نے مختلف عالمی چیلنجز سے نمٹنے کے لیے ایک دوسرے کے ساتھ مل کر کام کیا ہے۔
انہوں نے جنوبی ایشیا میں امن و استحکام کے لیے امریکی صدر ڈونلڈ ٹرمپ کے کردار کو سراہتے ہوئے کہا کہ ان کی کوششوں نے ایک ممکنہ تباہ کن جنگ کو روکنے میں اہم کردار ادا کیا، جس کے نتیجے میں لاکھوں نہیں بلکہ کروڑوں انسانی جانیں محفوظ رہیں۔
وزیراعظم شہباز شریف نے عالمی تنازعات کے پرامن حل کے لیے صدر ٹرمپ کی سفارتی کوششوں کو بھی قابلِ تحسین قرار دیتے ہوئے امید ظاہر کی کہ مستقبل میں بھی عالمی امن اور استحکام کے لیے مشترکہ اقدامات جاری رہیں گے۔
انہوں نے اپنے پیغام کے اختتام پر کہا کہ پاکستان امریکا کے ساتھ اپنی شراکت داری کو مزید وسعت دینے، اقتصادی تعاون، سرمایہ کاری، تجارت اور باہمی مفاد کے دیگر شعبوں میں تعلقات کو فروغ دینے کے لیے پرعزم ہے اور دونوں ممالک ایک روشن اور امید افزا مستقبل کی جانب مشترکہ سفر جاری رکھیں گے۔
