اسلام آباد: پاکستان میں سعودی عرب کے سفیر نواف بن سعید المالکی نے وفاقی وزیر داخلہ و انسدادِ منشیات محسن رضا نقوی کے اعزاز میں ایک خصوصی استقبالیہ تقریب کا اہتمام کیا، جس کا مقصد پاکستان اور سعودی عرب کے درمیان دوطرفہ تعاون اور شراکت داری کو مزید مستحکم بنانا تھا۔
تقریب اسلام آباد میں منعقد ہوئی جس میں اسلام آباد کے چیف کمشنر، چیئرمین کیپیٹل ڈویلپمنٹ اتھارٹی (سی ڈی اے) سہیل اشرف اور انسپکٹر جنرل اسلام آباد پولیس علی ناصر رضوی سمیت اعلیٰ حکام نے شرکت کی۔
اس موقع پر دونوں برادر ممالک کے درمیان مختلف شعبوں میں جاری تعاون کو مزید وسعت دینے اور باہمی روابط کو مضبوط بنانے کے عزم کا اعادہ کیا گیا۔ شرکاء نے اس امر پر زور دیا کہ پاکستان اور سعودی عرب کے درمیان دیرینہ برادرانہ تعلقات مشترکہ اعتماد، احترام اور باہمی مفادات پر مبنی ہیں، جنہیں مزید فروغ دینے کے لیے دونوں ممالک مسلسل مشترکہ اقدامات کر رہے ہیں۔
تقریب میں داخلی سلامتی، انسدادِ منشیات، انتظامی تعاون اور باہمی روابط کے فروغ سمیت مختلف شعبوں میں تعاون کو مزید مستحکم بنانے کے امکانات پر بھی تبادلہ خیال کیا گیا۔
پاکستان اور سعودی عرب کے درمیان قریبی تعلقات کو خطے کے امن، استحکام اور مشترکہ ترقی کے لیے اہم قرار دیتے ہوئے دونوں ممالک نے مستقبل میں بھی اعلیٰ سطحی روابط اور مشترکہ تعاون جاری رکھنے کے عزم کا اظہار کیا۔
