نوشکی: بلوچستان کے ضلع نوشکی میں سکیورٹی فورسز نے انٹیلی جنس اطلاعات کی بنیاد پر کامیاب آپریشن کرتے ہوئے فتنۃ الہندوستان سے تعلق رکھنے والے 7 دہشت گرد ہلاک کر دیے، جبکہ ان کے زیر استعمال اسلحہ، بارودی مواد اور دیسی ساختہ دھماکا خیز آلات بھی تباہ کر دیے گئے۔
پاک فوج کے شعبہ تعلقات عامہ (آئی ایس پی آر) کے مطابق 30 اور 31 جولائی کی درمیانی شب ضلع نوشکی میں دہشت گردوں کی موجودگی کی اطلاع پر انٹیلی جنس بیسڈ آپریشن کیا گیا۔
بیان کے مطابق سکیورٹی فورسز نے مصدقہ اطلاعات کی بنیاد پر دہشت گردوں کے ٹھکانے کا سراغ لگایا اور ہدفی کارروائی کے دوران بھارتی سرپرستی میں سرگرم فتنۃ الہندوستان کے 7 دہشت گردوں کو ہلاک کر دیا۔ ہلاک ہونے والوں میں ایک خودکش بمبار بھی شامل تھا۔
آئی ایس پی آر نے بتایا کہ کارروائی کے دوران دہشت گردوں کے ٹھکانے پر موجود اسلحہ، گولہ بارود، دیسی ساختہ دھماکا خیز مواد (IEDs) اور دیگر جنگی سامان کو بھی موقع پر ہی تباہ کر دیا گیا تاکہ اسے مستقبل میں دہشت گرد کارروائیوں کے لیے استعمال نہ کیا جا سکے۔
بیان میں کہا گیا کہ سکیورٹی فورسز ملک سے دہشت گردی کے مکمل خاتمے کے لیے پرعزم ہیں اور قومی سلامتی کو درپیش خطرات کے خلاف انٹیلی جنس پر مبنی کارروائیاں بلا تعطل جاری رہیں گی۔
