بیونس آئرس، ارجنٹائن کے مغربی صوبے سان جوآن میں جنگلاتی آگ بجھانے کے مشن پر مامور ایک ہیلی کاپٹر گر کر تباہ ہونے کے نتیجے میں سات افراد ہلاک ہو گئے۔
غیر ملکی میڈیا رپورٹس کے مطابق حادثے کا شکار ہونے والا بیل 412 (Bell 412) ہیلی کاپٹر سان جوآن کے اسچیگوالاستو نیچرل پارک میں آگ بجھانے کی کارروائیوں میں شریک تھا اور بدھ کی صبح پڑوسی صوبے لا ریوجا میں جنگلاتی آگ پر قابو پانے کے لیے روانہ ہوا تھا۔
سان جوآن کے گورنر مارسیلو اوریگو نے سوشل میڈیا پلیٹ فارم ایکس (X) پر حادثے کی تصدیق کرتے ہوئے کہا کہ اس افسوسناک واقعے میں سات افراد جان کی بازی ہار گئے۔ انہوں نے متاثرہ خاندانوں سے اظہارِ تعزیت کرتے ہوئے کہا کہ صوبہ اس سانحے پر گہرے رنج و غم میں مبتلا ہے۔
حکام کے مطابق ہلاک ہونے والوں میں فائر فائٹرز، پولیس اہلکار اور سول پروٹیکشن (شہری تحفظ) کے اہلکار شامل ہیں، جو جنگلاتی آگ پر قابو پانے کے مشن میں مصروف تھے۔
ایمرجنسی سروسز نے بتایا کہ بدھ کی صبح ہیلی کاپٹر کا اپنے آپریشنل بیس سے رابطہ منقطع ہو گیا تھا، جس کے بعد تلاش شروع کی گئی اور بعد ازاں اس کے گر کر تباہ ہونے کی تصدیق ہوئی۔
حکام کا کہنا ہے کہ حادثے کی وجوہات جاننے کے لیے باضابطہ تحقیقات شروع کر دی گئی ہیں، جبکہ تکنیکی ماہرین جائے وقوعہ سے شواہد اکٹھے کر رہے ہیں۔
