بخارسٹ، رومانیہ میں پاکستان کے سفیر الیاس نظامی نے یونیورسٹی آف بخارسٹ کی "جسٹنین پیٹریارک” فیکلٹی آف آرتھوڈوکس تھیولوجی کا دورہ کیا، جہاں انہوں نے سینٹر فار انٹر ریلیجس اینڈ انٹر کلچرل اسٹڈیز اینڈ ڈائیلاگ کے ڈائریکٹر ریورنڈ ڈاکٹر ویلنٹین ایلی سے ملاقات کی۔
ملاقات کے دوران مختلف مذہبی اور ثقافتی برادریوں کے درمیان بین المذاہب مکالمے، باہمی افہام و تفہیم، مذہبی رواداری اور تعاون کے فروغ پر تفصیلی تبادلہ خیال کیا گیا۔
سفیر الیاس نظامی نے اس موقع پر مذہبی اقلیتوں کے حقوق کے تحفظ، مذہبی آزادی کے فروغ اور مختلف عقائد سے تعلق رکھنے والی برادریوں کے درمیان پرامن بقائے باہمی کے لیے پاکستان کے عزم کا اعادہ کیا۔
ملاقات کے دوران سفیر نے خیرسگالی کے اظہار کے طور پر ریورنڈ ڈاکٹر ویلنٹین ایلی کو ایک خصوصی کتاب بھی پیش کی، جس میں پاکستان کے تاریخی گرجا گھروں، ان کے تعمیراتی حسن اور ملک کے متنوع مذہبی و ثقافتی ورثے کو اجاگر کیا گیا ہے۔
سفیر نظامی نے یونیورسٹی آف بخارسٹ کے سینٹر فار انٹر ریلیجس اینڈ انٹر کلچرل اسٹڈیز اینڈ ڈائیلاگ اور پاکستان کے متعلقہ جامعات و تحقیقی اداروں کے درمیان ادارہ جاتی تعاون، علمی تبادلوں اور مشترکہ تحقیقی منصوبوں کے فروغ میں پاکستان کی دلچسپی کا اظہار بھی کیا۔
یہ دورہ بین المذاہب ہم آہنگی، علمی روابط، ثقافتی سفارت کاری اور پاکستان و رومانیہ کے درمیان تعلیمی تعاون کو مزید مستحکم بنانے کی کوششوں کا عکاس قرار دیا جا رہا ہے۔
