اسلام آباد: نائب وزیراعظم و وزیر خارجہ سینیٹر محمد اسحاق ڈار سے کویت کے وزیر خارجہ شیخ جراح جابر الاحمد الصباح نے دفتر خارجہ میں ملاقات کی، جس میں پاکستان اور کویت کے دوطرفہ تعلقات، علاقائی صورتحال اور مشرقِ وسطیٰ میں جاری پیش رفت پر تفصیلی تبادلہ خیال کیا گیا۔
دفتر خارجہ کے مطابق دونوں رہنماؤں کے درمیان ہونے والی ون آن ون ملاقات خوشگوار اور نتیجہ خیز ماحول میں ہوئی، جس میں پاکستان اور کویت کے دیرینہ برادرانہ تعلقات کے تمام پہلوؤں کا جامع جائزہ لیا گیا۔
ملاقات کے دوران دونوں وزرائے خارجہ نے باہمی اعتماد، مشترکہ مفادات اور تاریخی دوستی پر مبنی شراکت داری کو مزید مستحکم بنانے کے اپنے مشترکہ عزم کا اعادہ کیا۔ اس موقع پر تجارت، سرمایہ کاری، اقتصادی تعاون اور دیگر باہمی دلچسپی کے شعبوں میں روابط کو مزید فروغ دینے پر بھی اتفاق کیا گیا۔
دونوں رہنماؤں نے علاقائی اور عالمی امور پر بھی تفصیلی گفتگو کی، جس میں خاص طور پر مشرقِ وسطیٰ کی تیزی سے بدلتی ہوئی صورتحال، خطے میں امن و استحکام اور سفارتی کوششوں پر تبادلۂ خیال کیا گیا۔
پاکستان اور کویت نے اس بات پر بھی اتفاق کیا کہ باہمی مشاورت اور اعلیٰ سطحی رابطوں کا سلسلہ جاری رکھا جائے گا تاکہ دوطرفہ تعلقات کو مزید وسعت دی جا سکے اور علاقائی و بین الاقوامی چیلنجز پر قریبی تعاون کو فروغ دیا جا سکے۔
