اسلام آباد: وزیراعظم محمد شہباز شریف نے کویت اور دیگر برادر خلیجی ممالک پر ہونے والے حملوں کی سخت الفاظ میں مذمت کرتے ہوئے کہا ہے کہ پاکستان خطے میں امن، استحکام اور کشیدگی کے خاتمے کے لیے ایک دیانتدار اور مخلص ثالث و سہولت کار کے طور پر اپنا کردار ادا کر رہا ہے۔
وزیراعظم آفس کے میڈیا ونگ کے مطابق یہ بات وزیراعظم نے کویت کے وزیر خارجہ شیخ جراح جابر الاحمد الصباح سے ملاقات کے دوران کہی، جنہوں نے بدھ کو اسلام آباد میں ان سے ملاقات کی۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وفاقی وزرائے دفاع، تجارت، قومی غذائی تحفظ و تحقیق، مواصلات، بحری امور، پٹرولیم، وزیراعظم کے مشیر اور دیگر اعلیٰ حکام بھی شریک تھے۔
وزیراعظم نے کویتی وزیر خارجہ کا خیرمقدم کرتے ہوئے امیرِ کویت شیخ مشعل الاحمد الجابر الصباح اور ولی عہد شیخ صباح الخالد الحمد المبارک الصباح کے لیے نیک تمناؤں کا اظہار کیا۔
شہباز شریف نے پاکستان اور کویت کے درمیان مشترکہ اقدار، باہمی اعتماد اور تاریخی برادرانہ تعلقات کا ذکر کرتے ہوئے کہا کہ دونوں ممالک نے ہر مشکل اور خوشی کے موقع پر ایک دوسرے کا ساتھ دیا ہے۔
علاقائی صورتحال پر گفتگو کرتے ہوئے وزیراعظم نے کویت کی قیادت اور عوام کے ساتھ پاکستان کی مکمل یکجہتی کا اعادہ کیا اور جاری بحران کے دوران کویت اور دیگر خلیجی ممالک پر ہونے والے حملوں کی شدید مذمت کی۔
انہوں نے کہا کہ پاکستان خطے میں امن کے قیام، کشیدگی میں کمی اور تنازعات کے حل کے لیے سفارت کاری کو فروغ دینے کے لیے سرگرم کردار ادا کر رہا ہے، جبکہ اس سلسلے میں پاکستان کی کوششوں کی حمایت پر کویتی قیادت کا شکریہ بھی ادا کیا۔
وزیراعظم نے دونوں ممالک کے درمیان تعلقات کی مثبت پیشرفت پر اطمینان کا اظہار کرتے ہوئے تجارت، سرمایہ کاری، توانائی، زراعت، انفارمیشن ٹیکنالوجی، بحری امور اور افرادی قوت کی ترقی سمیت مختلف شعبوں میں تعاون کو مزید وسعت دینے کے عزم کا اعادہ کیا۔
انہوں نے کویت میں مقیم پاکستانی برادری کی میزبانی پر کویتی حکومت کا شکریہ ادا کیا اور کہا کہ پاکستانی کمیونٹی کویت کی سماجی اور معاشی ترقی میں قابل قدر کردار ادا کر رہی ہے۔
اس موقع پر کویتی وزیر خارجہ شیخ جراح جابر الاحمد الصباح نے کویتی قیادت کی جانب سے وزیراعظم شہباز شریف کے لیے نیک خواہشات کا پیغام پہنچایا اور باہمی مفاد کے تمام شعبوں میں دوطرفہ تعاون کو مزید مضبوط بنانے کے عزم کا اظہار کیا۔
انہوں نے خطے میں امن کی بحالی، سفارت کاری کے فروغ اور موجودہ بحران کے حل کے لیے پاکستان، بالخصوص وزیراعظم شہباز شریف، نائب وزیراعظم اسحاق ڈار اور فیلڈ مارشل سید عاصم منیر کی کوششوں کو سراہا، جبکہ مشکل وقت میں کویت کے ساتھ پاکستان کی غیر متزلزل حمایت پر پاکستانی قیادت اور عوام کا شکریہ بھی ادا کیا۔
ملاقات کے اختتام پر دونوں فریقوں نے باہمی دلچسپی کے امور پر مسلسل مشاورت، اعلیٰ سطحی رابطوں اور مستقبل قریب میں وفود کے تبادلے پر اتفاق کیا۔ وزیراعظم نے اس موقع پر کویت کے ولی عہد کو پاکستان کے سرکاری دورے کی دعوت کا بھی اعادہ کیا۔
