راولپنڈی: چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کویت کے ساتھ پاکستان کے مضبوط اور دیرینہ تعلقات کے عزم کا اعادہ کرتے ہوئے کہا ہے کہ دونوں برادر ممالک خطے میں امن، استحکام اور خوشحالی کے لیے مشترکہ وژن رکھتے ہیں۔
پاک فوج کے شعبہ تعلقات عامہ (آئی ایس پی آر) کے مطابق کویت کے وزیر خارجہ شیخ جراح جابر الاحمد الصباح نے پاکستان میں کویت کے سفیر ناصر عبدالرحمن جے المطیری کے ہمراہ جنرل ہیڈکوارٹرز (جی ایچ کیو) راولپنڈی کا دورہ کیا، جہاں انہوں نے فیلڈ مارشل سید عاصم منیر سے ملاقات کی۔
ملاقات کے دوران باہمی دلچسپی کے امور، خطے کی مجموعی سیکیورٹی صورتحال، دفاعی تعاون اور پاکستان و کویت کے درمیان دوطرفہ تعلقات کو مزید مضبوط بنانے کے مختلف پہلوؤں پر تفصیلی تبادلہ خیال کیا گیا۔
آئی ایس پی آر کے مطابق کویتی وزیر خارجہ نے پاکستان کے ساتھ اپنے ملک کے قریبی تعلقات کو سراہتے ہوئے علاقائی امن و استحکام کے فروغ میں پاکستان کے تعمیری کردار اور دونوں برادر ممالک کے درمیان موجود گہرے برادرانہ روابط کی تعریف کی۔
اس موقع پر فیلڈ مارشل سید عاصم منیر نے اس عزم کا اظہار کیا کہ پاکستان کویت کے ساتھ اپنے تاریخی اور برادرانہ تعلقات کو مزید مستحکم بنانے کے لیے پُرعزم ہے۔ انہوں نے اس بات پر زور دیا کہ دونوں ممالک کے درمیان قریبی تعاون نہ صرف دوطرفہ تعلقات بلکہ خطے میں امن، استحکام اور مشترکہ خوشحالی کے فروغ میں بھی اہم کردار ادا کرے گا۔
