پاکستان ریلوے نے مسافروں کی سہولت کے پیش نظر لاہور، قصور، رائیونڈ اور پاکپتن کے درمیان چلنے والی بلھے شاہ پسنجر ٹرین کو 17 جولائی 2026ء سے دوبارہ بحال کرنے کا فیصلہ کر لیا ہے۔
ریلوے حکام کے مطابق 257 اَپ بلھے شاہ پسنجر پاکپتن ریلوے اسٹیشن سے روزانہ صبح 5:00 بجے روانہ ہوگی۔ یہ ٹرین قصور اور رائیونڈ سے ہوتی ہوئی صبح 10:50 بجے لاہور ریلوے اسٹیشن پہنچے گی۔
اسی طرح 258 ڈاؤن بلھے شاہ پسنجر لاہور سے روزانہ شام 4:00 بجے روانہ ہوگی اور قصور و رائیونڈ سے گزرتے ہوئے رات 9:30 بجے پاکپتن ریلوے اسٹیشن پہنچے گی۔
پاکستان ریلوے کا کہنا ہے کہ اس سروس کی بحالی سے لاہور، قصور، رائیونڈ اور پاکپتن کے درمیان سفر کرنے والے مسافروں کو بہتر سفری سہولت میسر آئے گی، جبکہ روزانہ سفر کرنے والے طلبہ، ملازمین اور دیگر شہری بھی اس سے مستفید ہوں گے۔
ریلوے حکام کے مطابق بلھے شاہ پسنجر ٹرین کی بحالی عوامی سفری سہولتوں میں اضافے اور علاقائی رابطوں کو مزید بہتر بنانے کی حکومتی کوششوں کا حصہ ہے۔
