اسلام آباد: کویت کے وزیر خارجہ شیخ جراح جابر الاحمد الصباح دو روزہ سرکاری دورے پر پاکستان پہنچ گئے، جہاں وہ اعلیٰ پاکستانی قیادت کے ساتھ دوطرفہ تعلقات، علاقائی صورتحال اور عالمی امور پر اہم ملاقاتیں کریں گے۔
ترجمان دفتر خارجہ کے مطابق کویتی وزیر خارجہ پاکستان کے نائب وزیراعظم اور وزیر خارجہ اسحاق ڈار کی دعوت پر اسلام آباد پہنچے ہیں۔ نور خان ایئربیس پر وزارت خارجہ کے ایڈیشنل سیکریٹری (مشرق وسطیٰ) زاہد حسین نے ان کا استقبال کیا۔
دفتر خارجہ کے مطابق دورے کے دوران دونوں ممالک کے درمیان سیاسی، اقتصادی، تجارتی اور سرمایہ کاری کے شعبوں میں تعاون بڑھانے کے امکانات پر تبادلہ خیال کیا جائے گا۔
اس کے علاوہ پاکستان اور کویت کی قیادت علاقائی و بین الاقوامی صورتحال، مشرق وسطیٰ کی تازہ پیش رفت، امن و استحکام اور باہمی دلچسپی کے دیگر اہم امور پر بھی تفصیلی گفتگو کرے گی۔
حکام کے مطابق یہ دورہ پاکستان اور کویت کے درمیان برادرانہ تعلقات کو مزید مستحکم کرنے اور مختلف شعبوں میں دوطرفہ تعاون کو وسعت دینے میں اہم پیش رفت ثابت ہوسکتا ہے۔
