بھارت نے اپنی سفارتی تاریخ میں ایک غیر معمولی اقدام کرتے ہوئے پہلی بار ایک غیر مسلم سفارت کار کو سعودی عرب میں اپنا سفیر مقرر کر دیا ہے۔ بھارتی وزارت خارجہ کے مطابق تجربہ کار سفارت کار Vipul کو سعودی عرب میں بھارت کا نیا سفیر تعینات کیا گیا ہے اور وہ جلد ریاض میں اپنی ذمہ داریاں سنبھالیں گے۔
بھارتی وزارت خارجہ کے جاری کردہ بیان کے مطابق وپول کا تعلق 1998 بیچ کی انڈین فارن سروس (IFS) سے ہے اور وہ اس وقت Qatar میں بھارت کے سفیر کے طور پر خدمات انجام دے رہے ہیں۔
یہ تقرری اس لیے بھی توجہ کا مرکز بن گئی ہے کیونکہ ماضی میں سعودی عرب کی مذہبی اہمیت، حج انتظامات اور دونوں ممالک کے خصوصی تعلقات کے پیش نظر بھارت عموماً مسلم سفارت کاروں کو ہی ریاض میں سفیر تعینات کرتا رہا ہے۔ مبصرین کے مطابق یہ روایت پہلی مرتبہ تبدیل کی گئی ہے۔
تجزیہ کاروں کے مطابق یہ تقرری بھارت اور Saudi Arabia کے درمیان تعلقات کی بدلتی نوعیت کی عکاسی کرتی ہے۔ دونوں ممالک کے روابط اب صرف حج، عمرہ اور توانائی کے شعبے تک محدود نہیں رہے بلکہ تجارت، سرمایہ کاری، دفاعی تعاون، ٹیکنالوجی اور علاقائی سلامتی سمیت متعدد شعبوں تک پھیل چکے ہیں۔
ماہرین کا کہنا ہے کہ وپول کی تقرری سے ظاہر ہوتا ہے کہ نئی دہلی اب سعودی عرب کے ساتھ تعلقات کو زیادہ وسیع اقتصادی اور اسٹریٹجک تناظر میں دیکھ رہا ہے، جبکہ دونوں ممالک کے درمیان گزشتہ چند برسوں میں تعاون کے نئے مواقع بھی پیدا ہوئے ہیں۔
