میدوگوری: نائجیریا کی وسطی بینو (Benue) ریاست میں مسلح افراد کے حملے میں کم از کم 14 دیہاتی ہلاک جبکہ متعدد دیگر زخمی ہوگئے۔ مقامی حکام کے مطابق یہ حملہ منگل کی صبح سویرے اوٹکپو (Otukpo) کے علاقے میں واقع ایفی (Efi) گاؤں پر کیا گیا۔
خبر رساں ادارے رائٹرز کے مطابق اوٹکپو کونسل کے چیئرمین میکسویل اوگیری نے بتایا کہ مسلح حملہ آوروں نے بغیر کسی پیشگی انتباہ کے گاؤں پر دھاوا بول دیا، جس کے نتیجے میں کم از کم 14 افراد جان کی بازی ہار گئے جبکہ کئی دیگر زخمی ہوئے۔
میکسویل اوگیری نے حملے کا الزام فلانی ملیشیا پر عائد کرتے ہوئے کہا کہ حالیہ دنوں میں قریبی دیہات بھی اسی نوعیت کے حملوں کا نشانہ بن چکے ہیں۔
نائجیریا کی بینو ریاست گزشتہ کئی برسوں سے کسانوں اور چرواہوں کے درمیان زمین اور قدرتی وسائل کے تنازعات کا مرکز بنی ہوئی ہے۔ مقامی کسانوں کا مؤقف ہے کہ چرواہوں کے مویشی ان کی فصلیں تباہ کرتے ہیں، جبکہ دوسری جانب چرواہے بھی دیہات پر حملوں کے الزامات کا سامنا کرتے رہے ہیں۔
فلانی برادری، جو زیادہ تر نائجیریا کے مسلم اکثریتی شمالی علاقوں سے تعلق رکھنے والے خانہ بدوش چرواہوں پر مشتمل ہے، ماضی میں ایسے الزامات کی تردید کرتی رہی ہے۔ تازہ حملے کی ذمہ داری بھی تاحال کسی گروہ نے قبول نہیں کی۔
دوسری جانب بینو پولیس کے ترجمان اُدیمے ایڈیٹ (Udeme Edet) نے بتایا کہ سکیورٹی فورسز کو متاثرہ علاقے میں تعینات کر دیا گیا ہے اور واقعے کی تحقیقات جاری ہیں۔
