پاکستان کرکٹ بورڈ (پی سی بی) نے ڈومیسٹک سیزن 2026-27 کے آغاز کے لیے نیشنل چیمپئنز کپ کے شیڈول اور چاروں ٹیموں کے اسکواڈز کا باضابطہ اعلان کر دیا ہے۔ یہ ون ڈے ٹورنامنٹ 11 سے 18 اگست تک ملتان کرکٹ اسٹیڈیم میں کھیلا جائے گا اور اسے آئندہ آئی سی سی مینز ورلڈ کپ کی تیاریوں کا اہم مرحلہ قرار دیا جا رہا ہے۔
ٹورنامنٹ میں مجموعی طور پر سات ون ڈے میچز، بشمول فائنل، کھیلے جائیں گے۔ تمام ڈے اینڈ نائٹ میچز دوپہر 3 بجے شروع ہوں گے۔ ایونٹ میں پاکستان گرینز، پاکستان گولڈ، پاکستان وائٹس اور پاکستان بلیوز کی ٹیمیں حصہ لیں گی۔
پی سی بی کی نیشنل سلیکشن کمیٹی نے ہر ٹیم کے لیے 11 کھلاڑیوں پر مشتمل اسکواڈ تشکیل دیا ہے، جبکہ 13 ریزرو کھلاڑیوں کا بھی اعلان کیا گیا ہے۔ انجری یا کنکشن کی صورت میں ٹیمیں ریزرو کھلاڑیوں کو اسکواڈ میں شامل کر سکیں گی۔
ٹورنامنٹ کے لیے شاداب خان، شاہین شاہ آفریدی، صائم ایوب اور صاحبزادہ فرحان کو ٹیموں کی قیادت سونپی گئی ہے۔ اعجاز جونیئر، مصباح الحق، اقبال امام اور اعزاز چیمہ مختلف ٹیموں کے ہیڈ کوچز کی ذمہ داریاں نبھائیں گے۔
شاہین شاہ آفریدی کی قیادت میں عبدالصمد، حیدر علی، معاذ صداقت اور محمد نواز میدان میں اتریں گے، جبکہ صاحبزادہ فرحان کی ٹیم میں عرفات منہاس، حسن علی، شامل حسین، سفیان مقیم اور حسین طلعت شامل ہیں۔
صائم ایوب کی ٹیم میں علی رضا، حارث رؤف، حسن نواز، خوشدل شاہ، وسیم جونیئر اور عثمان خان شامل کیے گئے ہیں، جبکہ شاداب خان کی زیر قیادت فخر زمان، محمد حسنین، سلمان مرزا، نسیم شاہ اور سمیر منہاس اپنی صلاحیتوں کا مظاہرہ کریں گے۔
اس موقع پر پی سی بی کے ڈائریکٹر ہائی پرفارمنس عاقب جاوید نے کہا کہ بورڈ کا مقصد کھلاڑیوں کو زیادہ سے زیادہ ون ڈے کرکٹ کے مواقع فراہم کرنا ہے تاکہ وہ اپنے مخصوص کردار کے مطابق بہتر تیاری کر سکیں۔ ان کے مطابق نیشنل چیمپئنز کپ آئندہ عالمی مقابلوں کے لیے قومی کھلاڑیوں کی تیاری میں اہم کردار ادا کرے گا۔
