جنوبی افریقہ ویمن انڈر 19 کرکٹ ٹیم نے پانچ ٹی ٹوئنٹی میچوں پر مشتمل سیریز کے پہلے مقابلے میں پاکستان ویمن انڈر 19 کو 7 وکٹوں سے شکست دے کر سیریز میں 0-1 کی برتری حاصل کرلی۔
کراچی کے نیشنل بینک اسٹیڈیم میں کھیلے گئے میچ میں پاکستان ویمن انڈر 19 نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 103 رنز بنائے۔ قومی ٹیم کی جانب سے اقصیٰ نے 38 رنز کی ذمہ دارانہ اننگز کھیلی جبکہ ذوفشاں نے 30 رنز بنا کر نمایاں کارکردگی کا مظاہرہ کیا۔
104 رنز کے ہدف کے تعاقب میں جنوبی افریقہ ویمن انڈر 19 کی ٹیم نے پراعتماد بیٹنگ کا مظاہرہ کرتے ہوئے مطلوبہ ہدف 16ویں اوور میں صرف 3 وکٹوں کے نقصان پر حاصل کرلیا اور سیریز کا آغاز کامیابی سے کیا۔
پاکستانی بولرز حریف ٹیم کو زیادہ دیر تک دباؤ میں رکھنے میں کامیاب نہ ہو سکے، جس کے باعث جنوبی افریقی بیٹرز نے نسبتاً آسانی سے ہدف حاصل کرتے ہوئے اپنی ٹیم کو فتح دلائی۔
پانچ میچوں کی اس ٹی ٹوئنٹی سیریز کا یہ افتتاحی مقابلہ تھا، جبکہ دونوں ٹیمیں آئندہ میچوں میں ایک دوسرے کے مدمقابل ہوں گی۔ سیریز کے تمام میچز پاکستان کے پہلے اسپورٹس چینل جیو سوپر پر براہ راست نشر کیے جا رہے ہیں۔
