پاکستان کرکٹ بورڈ (پی سی بی) نے قومی کرکٹ کے معیار کو مزید بہتر بنانے کے لیے نیشنل کرکٹ اکیڈمی (این سی اے) میں جدید بائیو مکینکس لیب قائم کرنے کا فیصلہ کر لیا ہے۔ اس منصوبے کے تحت بین الاقوامی معیار کی تکنیکی سہولیات فراہم کی جائیں گی اور ایک غیرملکی بائیومیکانسٹ کی خدمات بھی حاصل کی جائیں گی۔
ذرائع کے مطابق نیشنل کرکٹ اکیڈمی میں بائیو مکینکس لیب کے لیے جگہ کا انتخاب مکمل کر لیا گیا ہے، جہاں جدید کیمرے، موشن سینسرز، فورس پلیٹس اور دیگر جدید آلات نصب کیے جائیں گے تاکہ کھلاڑیوں کی تکنیکی صلاحیتوں کا سائنسی بنیادوں پر تجزیہ کیا جا سکے۔
اطلاعات کے مطابق اس جدید لیب کی تعمیر رواں سال کے اختتام تک مکمل ہونے کا امکان ہے۔ اس سہولت سے خاص طور پر فاسٹ بولرز کی بولنگ ایکشن، انجری سے بچاؤ، فٹنس اور مجموعی کارکردگی کا تفصیلی جائزہ لینے میں مدد ملے گی، جبکہ دیگر کرکٹرز بھی اس جدید نظام سے استفادہ کر سکیں گے۔
پی سی بی کے ڈائریکٹر ہائی پرفارمنس عاقب جاوید کا کہنا ہے کہ اس وقت ملک میں جدید معیار کا کوئی بائیو مکینکس ریسرچ سینٹر موجود نہیں اور پرانا نظام اپنی افادیت کھو چکا ہے۔ انہوں نے کہا کہ نئی لیب قومی کرکٹ میں تحقیق، تربیت اور کھلاڑیوں کی کارکردگی کو بہتر بنانے کی جانب ایک اہم پیش رفت ثابت ہوگی۔
عاقب جاوید نے مزید بتایا کہ اس منصوبے کے لیے برطانیہ کی معروف لف برا یونیورسٹی سے مشاورت جاری ہے، جو بائیو مکینکس لیب کے قیام، تکنیکی معاونت اور جدید سائنسی طریقہ کار کی فراہمی میں پاکستان کرکٹ بورڈ کے ساتھ تعاون کرے گی۔
