وزیراعظم محمد شہباز شریف سے پاکستان میں عوامی جمہوریہ چین کے سفیر جیانگ زیڈونگ نے اسلام آباد میں ملاقات کی، جس میں پاک چین تعلقات، دوطرفہ تعاون اور علاقائی صورتحال پر تفصیلی تبادلہ خیال کیا گیا۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر برائے منصوبہ بندی، ترقی و خصوصی اقدامات احسن اقبال، وزیراعظم کے مشیر ڈاکٹر سید توقیر شاہ اور سیکرٹری خارجہ آمنہ بلوچ بھی شریک تھے۔
وزیراعظم شہباز شریف نے چین کے صدر شی جن پنگ اور وزیراعظم لی کیانگ کے لیے نیک تمناؤں اور خیرسگالی کے جذبات کا اظہار کرتے ہوئے پاکستان اور چین کے درمیان ہمہ موسمی تزویراتی تعاون پر مبنی شراکت داری کے عزم کا اعادہ کیا۔ انہوں نے رواں سال مئی میں اپنے دورۂ چین کو یاد کرتے ہوئے کہا کہ دونوں ممالک کی قیادت کے درمیان ہونے والے اہم فیصلوں اور معاہدوں پر عملدرآمد کے لیے قریبی تعاون جاری رکھا جائے گا تاکہ دونوں ممالک کے عوام اس کے ثمرات سے مستفید ہو سکیں۔
ملاقات کے دوران مشرقِ وسطیٰ، افغانستان اور جنوبی ایشیا سمیت مجموعی علاقائی صورتحال پر بھی تبادلہ خیال کیا گیا اور خطے میں امن، استحکام اور باہمی تعاون کے فروغ کی اہمیت پر زور دیا گیا۔
چینی سفیر جیانگ زیڈونگ نے وزیراعظم کا شکریہ ادا کرتے ہوئے کہا کہ چین پاکستان کو اپنا فولادی بھائی سمجھتا ہے اور پاکستان کی خودمختاری، علاقائی سالمیت، سماجی و اقتصادی ترقی اور باہمی تعاون کے فروغ کے لیے ہر ممکن حمایت جاری رکھے گا۔
