نائب وزیراعظم اور وزیر خارجہ سینیٹر اسحاق ڈار نے کہا ہے کہ پاکستان اب تک 70 سے زائد ایرانی شہریوں کی پاکستانی سرزمین کے ذریعے محفوظ وطن واپسی میں سہولت فراہم کر چکا ہے، جبکہ امریکی تحویل سے رہا ہونے والے مزید 22 ایرانی شہری کراچی پہنچ گئے ہیں۔
سوشل میڈیا پر جاری اپنے بیان میں اسحاق ڈار نے بتایا کہ امریکی تحویل سے رہائی پانے والے 22 ایرانی شہری کراچی میں ایرانی قونصل خانے پہنچ چکے ہیں، جہاں ان کی وطن واپسی کے لیے ضروری انتظامات کو حتمی شکل دی جا رہی ہے۔
انہوں نے کہا کہ ان ایرانی شہریوں کی واپسی کے عمل میں پاکستان اور ایران کے سفارتی مشنز قریبی تعاون کر رہے ہیں تاکہ انہیں محفوظ طریقے سے اپنے وطن روانہ کیا جا سکے۔
وزیر خارجہ کے مطابق ایرانی شہریوں کی منتقلی اور واپسی کے پورے عمل کے دوران پاکستانی حکام مسلسل امریکی اور ایرانی حکام کے ساتھ رابطے میں رہے تاکہ تمام مراحل کو مؤثر انداز میں مکمل کیا جا سکے۔
اسحاق ڈار نے بتایا کہ گزشتہ دو ماہ کے دوران یہ ایرانی شہریوں کا چوتھا گروپ ہے، جس کی وطن واپسی میں پاکستان نے سہولت کار کا کردار ادا کیا ہے۔ ان کے مطابق اب تک 70 سے زائد ایرانی شہری پاکستان کے ذریعے اپنے ملک واپس جا چکے ہیں۔
انہوں نے ایرانی قیادت کی جانب سے پاکستان پر اعتماد کے اظہار کو سراہتے ہوئے کہا کہ یہ دونوں برادر ممالک کے درمیان مضبوط سفارتی تعلقات کا مظہر ہے۔
اسحاق ڈار نے وزارت خارجہ اور متعلقہ پاکستانی اداروں کی خدمات کو خراج تحسین پیش کرتے ہوئے کہا کہ تمام اداروں نے ایرانی شہریوں کی محفوظ، منظم اور بروقت وطن واپسی کو یقینی بنانے کے لیے پیشہ ورانہ اور مؤثر کردار ادا کیا۔
