مکہ مکرمہ: پاکستان کرکٹ ٹیم کے سابق کپتان اور لیجنڈری فاسٹ بولر وسیم اکرم نے فریضۂ حج کی ادائیگی کے بعد سوشل میڈیا پر ایک جذباتی پیغام جاری کرتے ہوئے کہا ہے کہ حج پر جانے کا فیصلہ ان کا ذاتی اور روحانی انتخاب تھا۔
اپنے پیغام میں وسیم اکرم نے لکھا، ’’الحمد للّٰہ! اللّٰہ تعالیٰ کا لاکھ لاکھ شکر ہے کہ اس نے مجھے حجِ بیت اللّٰہ کی سعادت عطا فرمائی۔‘‘
انہوں نے سوشل میڈیا پر گردش کرنے والی قیاس آرائیوں کا جواب دیتے ہوئے کہا کہ بہت سے لوگوں نے اندازے لگائے کہ ان کا حج کس نے کروایا یا اس سفر کے اخراجات کس نے برداشت کیے، تاہم حقیقت یہ ہے کہ یہ ان کا مکمل ذاتی فیصلہ تھا۔
وسیم اکرم کے مطابق انہوں نے اپنے دل میں ایک ایسی روحانی کیفیت محسوس کی جہاں حج کا فریضہ ادا کرنا ضروری ہو گیا تھا۔ انہوں نے کہا کہ اس مقدس سفر نے ان کی روح میں ایک ایسی الہامی روشنی پیدا کی ہے جو ہمیشہ ان کے ساتھ رہے گی۔
سابق کپتان نے مزید لکھا کہ وہ دعا گو ہیں کہ ان کی طرح دیگر مسلمان بھائی اور بہنیں بھی حج کی سعادت حاصل کریں اور اس عظیم روحانی تجربے سے فیض یاب ہوں۔
واضح رہے کہ رواں سال حج کے موقع پر وسیم اکرم کے علاوہ متعدد پاکستانی معروف شخصیات نے بھی فریضۂ حج ادا کیا، جن میں سابق قومی کپتان مصباح الحق اور دیگر نمایاں شخصیات شامل ہیں۔
وسیم اکرم کے اس پیغام کو سوشل میڈیا صارفین کی جانب سے بھرپور پذیرائی مل رہی ہے اور مداح ان کے لیے نیک تمناؤں کا اظہار کر رہے ہیں۔
