لندن: برطانیہ کی اندرونی خفیہ ایجنسی ایم آئی 5 (MI5) اور پولیس سروس آف ناردرن آئرلینڈ (PSNI) کو بی بی سی کے سابق صحافی ونسنٹ کیرنی کے فون ریکارڈز غیرقانونی طور پر حاصل کرنے پر معاوضہ ادا کرنے کا حکم دے دیا گیا۔
خبر رساں ادارے کے مطابق ونسنٹ کیرنی، جو اس وقت آئرش نشریاتی ادارے RTE سے وابستہ ہیں، نے اپنے فون ڈیٹا تک غیرقانونی رسائی کے خلاف قانونی کارروائی کی تھی۔ یہ معاملہ بیلفاسٹ کے دو دیگر صحافیوں کی جانب سے دائر کیے گئے ایک الگ مقدمے کے دوران سامنے آیا تھا۔
لندن میں قائم تحقیقاتی پاورز ٹریبونل (Investigatory Powers Tribunal) نے اپنے فیصلے میں قرار دیا کہ صحافی کے فون ریکارڈز تک رسائی اس کے رازداری کے حقوق اور صحافتی ذرائع کے تحفظ میں غیرمتناسب مداخلت تھی۔
عدالت نے حکم دیا کہ ایم آئی 5 اور پولیس سروس آف ناردرن آئرلینڈ الگ الگ 10 ہزار پاؤنڈ (تقریباً 13,326 امریکی ڈالر) بطور معاوضہ ونسنٹ کیرنی کو ادا کریں۔
فیصلے کے بعد پی ایس این آئی کے چیف کانسٹیبل جون باؤچر نے بیان جاری کرتے ہوئے عدالتی فیصلے کو قبول کیا اور ونسنٹ کیرنی سے معذرت کی۔ انہوں نے کہا کہ اس واقعے کے بعد ادارے کی پالیسیوں اور طریقہ کار میں نمایاں اصلاحات کی جا چکی ہیں تاکہ مستقبل میں ایسے واقعات سے بچا جا سکے۔
یہ فیصلہ برطانیہ میں صحافیوں کے رازداری کے حقوق، ذرائع کے تحفظ اور قانون نافذ کرنے والے اداروں کی نگرانی سے متعلق اہم عدالتی پیش رفت قرار دیا جا رہا ہے۔
