اسلام آباد: وزیراعظم محمد شہباز شریف سے کینیڈا کی وزیر خارجہ انیتا آنند نے وزیراعظم ہاؤس میں ملاقات کی، جس میں پاکستان اور کینیڈا کے درمیان تجارت، سرمایہ کاری، زراعت، توانائی، معدنیات اور صنعتی تعاون کے فروغ سمیت دوطرفہ تعلقات کو مزید مضبوط بنانے پر اتفاق کیا گیا۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر برائے قومی غذائی تحفظ رانا تنویر حسین، وزیراعظم کے مشیر ڈاکٹر سید توقیر شاہ اور دیگر اعلیٰ حکام بھی شریک تھے۔
وزیراعظم شہباز شریف نے کینیڈین وزیر خارجہ کا خیرمقدم کرتے ہوئے کہا کہ پاکستان اور کینیڈا کے درمیان دوستانہ تعلقات موجود ہیں، تاہم تجارت، سرمایہ کاری، ایگری فوڈز، ویکسین سازی، قابلِ تجدید توانائی، آٹوموبائل اور آٹو پارٹس کی صنعت سمیت مختلف شعبوں میں تعاون کو مزید وسعت دینے کی ضرورت ہے۔
انہوں نے کینیڈا کے وزیراعظم مارک کارنی کے لیے نیک تمناؤں کا اظہار کرتے ہوئے کہا کہ وہ جلد ان سے ملاقات کے خواہشمند ہیں۔ وزیراعظم نے اپریل میں ہونے والی ٹیلی فونک گفتگو کا بھی ذکر کیا اور خطے میں امن کی کوششوں کے لیے پاکستان کی حمایت پر کینیڈا کا شکریہ ادا کیا۔
کینیڈا کی وزیر خارجہ انیتا آنند نے پرتپاک استقبال پر وزیراعظم شہباز شریف کا شکریہ ادا کرتے ہوئے کہا کہ وہ اپنے وزیراعظم مارک کارنی کا خیرسگالی کا پیغام لے کر آئی ہیں اور ان کا یہ دورہ دونوں ممالک کے تعلقات کو مزید وسعت دینے کے مقصد سے کیا جا رہا ہے۔
انہوں نے زراعت، معدنیات، توانائی، آٹوموبائل اور آٹو پارٹس کے شعبوں میں تجارت اور سرمایہ کاری کے نئے مواقع تلاش کرنے میں کینیڈا کی دلچسپی کا اظہار کیا۔ اس موقع پر انہوں نے کہا کہ فارن انویسٹمنٹ پروموشن اینڈ پروٹیکشن ایگریمنٹ (FIPPA) پاکستان میں کینیڈین سرمایہ کاروں کے اعتماد میں اضافے اور نئی سرمایہ کاری کے فروغ میں اہم کردار ادا کر سکتا ہے۔
دونوں رہنماؤں نے اس بات پر بھی اتفاق کیا کہ کینیڈا میں مقیم پاکستانی کمیونٹی دونوں ممالک کے درمیان مضبوط پل کی حیثیت رکھتی ہے۔ ملاقات میں تجارت اور معدنیات کے شعبوں میں وفود کے تبادلوں پر بھی اتفاق کیا گیا تاکہ باہمی مفاد کے نئے مواقع تلاش کیے جا سکیں اور دوطرفہ تجارت و سرمایہ کاری کو فروغ دیا جا سکے۔
ملاقات کے بعد وزیراعظم شہباز شریف نے پاکستان کو کینیڈا سے کینولا (Canola) کی درآمد کے لیے فائٹو سینیٹری ضوابط (Phyto-sanitary Regulations) کے پروٹوکول پر دستخط کی تقریب میں شرکت کی۔ اس معاہدے پر پاکستان کی جانب سے نائب وزیراعظم و وزیر خارجہ اسحاق ڈار جبکہ کینیڈا کی جانب سے وزیر خارجہ انیتا آنند نے دستخط کیے۔
