راولپنڈی: پاکستان کے دورے پر آئی کینیڈا کی وزیر خارجہ انیتا آنند نے جنرل ہیڈکوارٹرز (جی ایچ کیو) میں فیلڈ مارشل سید عاصم منیر سے ملاقات کی، جس میں باہمی دلچسپی، علاقائی سلامتی، انسداد دہشت گردی اور پاکستان و کینیڈا کے دوطرفہ تعلقات پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران فیلڈ مارشل سید عاصم منیر نے عالمی امن اور خطے کے استحکام کے حوالے سے پاکستان کا مؤقف پیش کرتے ہوئے مشترکہ سیکیورٹی چیلنجز سے نمٹنے کے لیے بین الاقوامی تعاون اور مشترکہ کوششوں کی اہمیت پر زور دیا۔
آئی ایس پی آر کے مطابق کینیڈا کی وزیر خارجہ انیتا آنند نے دہشت گردی کے خلاف پاکستان کی قربانیوں اور مؤثر اقدامات کو سراہا اور خطے میں امن و استحکام کے فروغ کے لیے پاکستان کے تعمیری کردار کی تعریف کی۔
ملاقات کے دوران دونوں فریقین نے دفاعی اور سیکیورٹی تعاون کو مزید مضبوط بنانے کے عزم کا اعادہ کیا، جبکہ باہمی روابط، دفاعی تعاون اور دوطرفہ تعلقات کو مزید وسعت دینے پر بھی اتفاق کیا گیا۔
فریقین نے اس بات پر زور دیا کہ پاکستان اور کینیڈا کے درمیان مختلف شعبوں میں تعاون کے فروغ سے دونوں ممالک کے تعلقات مزید مستحکم ہوں گے اور مشترکہ مفادات کے حصول میں مدد ملے گی۔
