وزیراعظم محمد شہباز شریف نے پاکستان اور ترکیہ کے درمیان ڈیجیٹل اور ٹیکنالوجی کے شعبوں میں تعاون کو مزید وسعت دینے پر زور دیتے ہوئے ترک ٹیلی کمیونیکیشن کمپنی ترک سیل (Turkcell) کو پاکستان میں فائیو جی، ڈیجیٹل انفراسٹرکچر اور جدید ٹیکنالوجی کے منصوبوں میں شراکت داری کی دعوت دے دی۔
وزیراعظم سے یہ ملاقات ترکیہ کے دورے کے دوران ترک سیل کے چیف ایگزیکٹو آفیسر علی طحہ کوچ نے کی، جس میں دونوں ممالک کے درمیان ڈیجیٹل تعاون، سرمایہ کاری اور جدید ٹیکنالوجی کے شعبوں میں مشترکہ مواقع پر تبادلہ خیال کیا گیا۔
وزیراعظم نے اس موقع پر حکومت کے "پاکستان-ترکیہ ڈیجیٹل کوریڈور” کے وژن کا ذکر کرتے ہوئے کہا کہ اس منصوبے کا مقصد علاقائی ڈیجیٹل رابطوں کو فروغ دینا، سرحد پار محفوظ ڈیٹا کے تبادلے کو آسان بنانا اور جدید ڈیجیٹل انفراسٹرکچر کو مربوط بنانا ہے۔
انہوں نے ترک سیل کو پاکستانی اداروں کے ساتھ طویل المدتی تعاون کے امکانات کا جائزہ لینے کی دعوت دیتے ہوئے کہا کہ کمپنی فائیو جی ٹیکنالوجی کے نفاذ، نیٹ ورک آپٹیمائزیشن، اسپیکٹرم مینجمنٹ، ڈیجیٹل انفراسٹرکچر کی ترقی اور ٹیکنالوجی کی منتقلی جیسے اہم شعبوں میں سرمایہ کاری کر سکتی ہے۔
وزیراعظم نے کمپنی کو ٹیلی کمیونیکیشن آلات کی مقامی تیاری، سافٹ ویئر ڈویلپمنٹ، ڈیجیٹل مہارتوں کے فروغ اور افرادی قوت کی استعداد کار بڑھانے کے منصوبوں میں بھی شراکت داری پر غور کرنے کی دعوت دی۔
انہوں نے کہا کہ اس نوعیت کا تعاون پاکستان کے ٹیکنالوجی ایکو سسٹم کو مضبوط بنانے، جدت طرازی کو فروغ دینے، روزگار کے نئے مواقع پیدا کرنے اور پائیدار اقتصادی ترقی میں اہم کردار ادا کرے گا۔
شہباز شریف نے اس موقع پر سرمایہ کار دوست اور شفاف کاروباری ماحول فراہم کرنے کے حکومتی عزم کا اعادہ کرتے ہوئے کہا کہ خصوصی سرمایہ کاری سہولت کونسل (SIFC) کے ذریعے انفارمیشن اینڈ کمیونیکیشن ٹیکنالوجی سمیت اہم شعبوں میں سرمایہ کاری کو ہر ممکن سہولت فراہم کی جا رہی ہے۔
ترک سیل کے چیف ایگزیکٹو آفیسر علی طحہ کوچ نے حکومتِ پاکستان کے ڈیجیٹل تبدیلی کے وژن کو سراہتے ہوئے کہا کہ کمپنی پاکستان میں ٹیلی کمیونیکیشن، ڈیجیٹل انفراسٹرکچر اور ابھرتی ہوئی ٹیکنالوجیز کے شعبوں میں تعاون کے وسیع امکانات دیکھ رہی ہے۔
انہوں نے اس عزم کا اظہار کیا کہ ترک سیل متعلقہ پاکستانی اداروں کے ساتھ مل کر ایسی شراکت داریاں قائم کرے گی جو دونوں ممالک کے مشترکہ اقتصادی اور تکنیکی اہداف کے حصول میں معاون ثابت ہوں۔
