اسلام آباد: پاکستان میں برطانیہ کی ہائی کمشنر جین میریٹ نے وزیر خزانہ محمد اورنگزیب سے اسلام آباد می ملاقات کی، جس میں پاکستان اور برطانیہ کے درمیان معاشی تعاون، سرمایہ کاری، مالیاتی اصلاحات اور دوطرفہ اقتصادی تعلقات کو مزید مضبوط بنانے کے مختلف پہلوؤں پر تفصیلی تبادلہ خیال کیا گیا۔
ملاقات کے دوران وزیر خزانہ نے برطانوی ہائی کمشنر کو وفاقی بجٹ 2026-27، مالیاتی استحکام کے لیے حکومتی اقدامات اور معاشی اصلاحات سے آگاہ کیا۔ انہوں نے کہا کہ حکومت کی اولین ترجیحات میں ٹیکس نیٹ کو وسعت دینا، محصولات میں اضافہ اور ملکی و غیر ملکی سرمایہ کاروں کا اعتماد مزید مستحکم کرنا شامل ہے۔
برطانوی ہائی کمشنر جین میریٹ نے پاکستان کی معاشی استحکام کی جانب پیش رفت کا خیرمقدم کرتے ہوئے حکومت کے اصلاحاتی ایجنڈے کی تعریف کی اور اس عزم کا اعادہ کیا کہ برطانیہ مستقبل میں بھی پاکستان کے معاشی اصلاحاتی پروگرام اور اقتصادی ترقی کی کوششوں میں تعاون جاری رکھے گا۔
محمد اورنگزیب نے بتایا کہ عالمی سرمایہ مارکیٹوں تک رسائی بڑھانے کے لیے وزارت خزانہ بانڈز، سکوک اور پانڈا بانڈز کے اجرا پر کام کر رہی ہے، جبکہ خودمختار قرض (Sovereign Debt) کی ٹوکنائزیشن سمیت جدید مالیاتی ذرائع سے استفادہ کرنے کی حکمت عملی پر بھی پیش رفت جاری ہے۔
انہوں نے مزید کہا کہ فیڈرل بورڈ آف ریونیو (ایف بی آر) میں مصنوعی ذہانت (AI)، فیس لیس اور رسک بیسڈ ٹیکس نظام متعارف کرانے کے اقدامات تیزی سے آگے بڑھ رہے ہیں تاکہ ٹیکس نظام کو شفاف، مؤثر اور جدید تقاضوں سے ہم آہنگ بنایا جا سکے۔
ملاقات میں توانائی کے شعبے میں اصلاحات، سرکاری اداروں کی نجکاری، مالیاتی منڈیوں کی ترقی، تجارت، سرمایہ کاری اور موسمیاتی تبدیلی سے نمٹنے کے لیے دوطرفہ تعاون بڑھانے پر بھی تبادلہ خیال کیا گیا۔
