انڈونیشیا کے سفیر کی آصفہ بھٹو زرداری سے ملاقات، تجارت، زراعت اور سرمایہ کاری کے فروغ پر اتفاق

اسلام آباد: پاکستان میں انڈونیشیا کے سفیر چندرا وارسینانتو سوکوتجو نے خاتونِ اول آصفہ بھٹو زرداری سے ملاقات کی، جس میں دوطرفہ تعلقات، تجارت، سرمایہ کاری، زراعت، صحت، تعلیم اور ٹیکنالوجی سمیت مختلف شعبوں میں تعاون بڑھانے پر تفصیلی تبادلہ خیال کیا گیا۔

ملاقات کے آغاز میں آصفہ بھٹو زرداری نے انڈونیشین سفیر کو پاکستان-انڈونیشیا سرمایہ کاری فورم کے کامیاب انعقاد پر مبارکباد پیش کی اور کہا کہ دونوں ممالک کے تعلقات باہمی احترام، مشترکہ اقدار اور تاریخی دوستی پر استوار ہیں۔

اس موقع پر انڈونیشیا کے سفیر چندرا وارسینانتو سوکوتجو نے کہا کہ انڈونیشیا پاکستان کے ساتھ دوطرفہ تجارت، سرمایہ کاری، زراعت، صحت اور ثقافتی روابط کو مزید وسعت دینے کے لیے پرعزم ہے اور دونوں ممالک کے درمیان تعاون کو نئی بلندیوں تک لے جانے کے لیے مشترکہ کوششیں جاری رہیں گی۔