اسلام آباد: اسلامی تعاون تنظیم (او آئی سی) کی دو روزہ 9ویں وزارتی کانفرنس برائے خواتین پیر کو وفاقی دارالحکومت اسلام آباد میں اختتام پذیر ہوگئی، جس کے بعد پاکستان نے آئندہ دو برس کے لیے او آئی سی وزارتی کانفرنس برائے خواتین کی سربراہی باضابطہ طور پر سنبھال لی۔
کانفرنس میں او آئی سی کے 57 رکن ممالک کے نمائندوں سمیت تقریباً 190 مندوبین نے شرکت کی۔ اجلاس سے چیئرمین سینیٹ اور سابق وزیراعظم سید یوسف رضا گیلانی، وزیراعلیٰ پنجاب مریم نواز شریف، وفاقی وزیر قانون، انصاف و انسانی حقوق سینیٹر اعظم نذیر تارڑ، وفاقی وزیر آئی ٹی شزا فاطمہ خواجہ، او آئی سی کے اعلیٰ حکام اور مختلف ممالک کے مندوبین نے خطاب کیا۔
اختتامی پریس کانفرنس سے خطاب کرتے ہوئے وفاقی وزیر قانون و انسانی حقوق اعظم نذیر تارڑ نے کہا کہ او آئی سی وزارتی کانفرنس برائے خواتین کی سربراہی پاکستان کے سپرد کیا جانا رکن ممالک کے پاکستان پر اعتماد کا مظہر ہے۔ انہوں نے او آئی سی جنرل سیکریٹریٹ، رکن ممالک، شراکت دار اداروں اور تمام مندوبین کا کانفرنس کی کامیابی میں کردار ادا کرنے پر شکریہ ادا کیا۔
انہوں نے بتایا کہ اختتامی اجلاس میں متفقہ طور پر کانفرنس کے مشاورتی نتائج کی منظوری دی گئی، جن میں مسلم دنیا میں خواتین کے معاشی، سماجی اور سیاسی کردار کو مزید مضبوط بنانے اور انہیں ترقی کے عمل میں مؤثر شمولیت دینے کے عزم کا اعادہ کیا گیا۔
اعظم نذیر تارڑ نے کہا کہ کانفرنس کے دوران ڈیجیٹل دور میں خواتین کو درپیش مواقع اور چیلنجز پر خصوصی توجہ دی گئی۔ رکن ممالک نے اس بات پر اتفاق کیا کہ خواتین کو جدید ٹیکنالوجی، ڈیجیٹل مہارتوں اور کاروباری مواقع سے آراستہ کیا جائے تاکہ وہ قومی معیشت اور معاشرتی ترقی میں بھرپور کردار ادا کر سکیں۔
وفاقی وزیر نے وزارت انسانی حقوق، وزارت خارجہ، وزارت اطلاعات و نشریات اور وزارت انفارمیشن ٹیکنالوجی سمیت تمام متعلقہ اداروں کی مشترکہ کاوشوں کو سراہتے ہوئے کہا کہ ان کی محنت سے یہ بین الاقوامی کانفرنس کامیابی سے منعقد ہوئی۔ انہوں نے وزیراعظم شہباز شریف کی قیادت اور سرپرستی پر بھی اظہارِ تشکر کیا۔
کانفرنس میں خواتین کے معاشی استحکام، تعلیم، ڈیجیٹل شمولیت، قیادت، کاروباری مواقع، فیصلہ سازی میں شرکت اور خواتین کے حقوق کے تحفظ جیسے اہم موضوعات پر تفصیلی غور کیا گیا۔ شرکاء نے اس عزم کا اعادہ کیا کہ او آئی سی رکن ممالک خواتین کو بااختیار بنانے اور ان کے لیے مساوی مواقع کی فراہمی کے لیے باہمی تعاون کو مزید فروغ دیں گے۔
پاکستان نے میزبان ملک کی حیثیت سے او آئی سی وزارتی کانفرنس برائے خواتین کی سربراہی سنبھالتے ہوئے اس عزم کا اظہار کیا کہ آئندہ دو برس کے دوران رکن ممالک کے ساتھ مل کر خواتین کی فلاح، ترقی اور بااختیار بنانے کے لیے مؤثر پالیسی سازی اور عملی تعاون کو مزید مضبوط بنایا جائے گا۔
