سعودی عرب نے بین الاقوامی سیاحوں کے لیے سفر کو مزید آسان بنانے کے مقصد سے نیا پیکج ٹورسٹ ویزا پروگرام متعارف کرا دیا ہے، جس کے پہلے مرحلے میں پاکستان سمیت سات ممالک کے شہری اس سہولت سے فائدہ اٹھا سکیں گے۔
سعودی وزارتِ سیاحت کے مطابق اس نئی اسکیم کے تحت اردن، مصر، پاکستان، بھارت، بنگلہ دیش، انڈونیشیا اور میکسیکو کے مسافر ایک ہی مربوط سفری پیکج کے ذریعے ٹورسٹ ویزا حاصل کر سکیں گے۔ اس اقدام کا مقصد پرواز، ہوٹل بکنگ اور الیکٹرانک ویزا کی سہولت کو ایک ہی بکنگ کے عمل میں شامل کر کے سفری مراحل کو آسان بنانا ہے۔
نئے نظام کے تحت درخواست گزاروں کو الگ سے ٹورسٹ ویزا کی درخواست جمع کرانے یا سعودی سفارت خانے جانے کی ضرورت نہیں ہوگی۔ منظور شدہ ٹریول فراہم کنندگان کے ذریعے سفری پیکج خریدنے کے بعد الیکٹرانک ٹورسٹ ویزا، سفری انشورنس اور دیگر ضروری سفری دستاویزات ای میل کے ذریعے فراہم کر دی جائیں گی۔
سعودی گزٹ کے مطابق منظور شدہ سفری پیکج کی خریداری مکمل ہونے کے بعد الیکٹرانک ویزا عام طور پر 48 گھنٹوں کے اندر جاری کر دیا جائے گا۔
وزارتِ سیاحت نے فی الحال دو مجاز سفری فراہم کنندگان ریزرول (Reservol) اور المسافر (Almosafer) کو اس پروگرام کے تحت خدمات فراہم کرنے کی منظوری دی ہے۔
حکام کے مطابق اس اسکیم کے تحت جاری ہونے والا سنگل انٹری ٹورسٹ ویزا تین ماہ تک مؤثر ہوگا، جبکہ زائرین سعودی عرب میں کم از کم دو دن اور زیادہ سے زیادہ 88 دن تک قیام کر سکیں گے۔
