وائٹ ہاؤس کے ایک ٹیلی پرامپٹر آپریٹر پر امریکی صدر ڈونلڈ ٹرمپ کی تقاریر کے متن سے مبینہ طور پر مالی فائدہ اٹھانے کا الزام سامنے آیا ہے، جس کے بعد متعلقہ اہلکار کو معطل کر کے بغیر تنخواہ رخصت پر بھیج دیا گیا۔
امریکی میڈیا رپورٹس کے مطابق وائٹ ہاؤس کے ٹیلی پرامپٹر آپریٹر گیبریل پیریز پر الزام ہے کہ وہ صدر ٹرمپ کی تقاریر نشر ہونے سے پہلے ان کا متن دیکھنے کی وجہ سے تقریر میں استعمال ہونے والے مخصوص الفاظ اور موضوعات پر آن لائن پریڈکشن مارکیٹ پلیٹ فارم پر شرطیں لگاتا تھا۔
رپورٹس میں دعویٰ کیا گیا ہے کہ گیبریل پیریز نے اس طریقہ کار کے ذریعے تقریباً ایک لاکھ ڈالر کا منافع حاصل کیا۔ بتایا گیا ہے کہ مشکوک سرگرمیوں کا سراغ لگنے کے بعد متعلقہ آن لائن پلیٹ فارم نے اس کا اکاؤنٹ منجمد کر دیا اور معاملہ امریکی ریگولیٹری ادارے کو رپورٹ کر دیا۔
وائٹ ہاؤس کی پریس سیکریٹری کیرولین لیویٹ نے تصدیق کی کہ صدر ڈونلڈ ٹرمپ کو اس معاملے سے آگاہ کر دیا گیا ہے۔
انہوں نے بتایا کہ ابتدائی کارروائی کے طور پر متعلقہ ملازم کو فوری طور پر معطل کر کے بغیر تنخواہ رخصت پر بھیج دیا گیا ہے اور وہ فی الحال وائٹ ہاؤس میں اپنی ذمہ داریاں انجام نہیں دے گا۔
تاحال امریکی حکام کی جانب سے اس معاملے میں کسی مجرمانہ الزام یا باضابطہ قانونی کارروائی کا اعلان نہیں کیا گیا، تاہم واقعے کی مزید تحقیقات جاری ہیں۔
