بلوچستان کے ضلع واشک کی تحصیل ماشکیل میں نامعلوم مسلح افراد کے حملے میں پنجاب سے تعلق رکھنے والے پانچ مزدور جاں بحق ہو گئے۔ جاں بحق افراد عرصہ دراز سے ماشکیل میں رہائش پذیر تھے اور حجامت کا کام کرکے اپنا روزگار کما رہے تھے۔
سیکیورٹی ذرائع کے مطابق حملہ آوروں نے نہتے مزدوروں کو نشانہ بنایا۔ جاں بحق ہونے والوں کی شناخت محمد بلال، محمد حسن، محمد قدیر، محسن اور بلال کے ناموں سے ہوئی ہے۔ تمام متاثرین کا تعلق پنجاب سے بتایا گیا ہے۔
ذرائع کے مطابق جاں بحق افراد غیر مسلح شہری تھے اور کئی برسوں سے ماشکیل میں محنت مزدوری کے ذریعے اپنے اہل خانہ کا گزر بسر کر رہے تھے۔
واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ حکام کا کہنا ہے کہ حملہ آوروں کی تلاش جاری ہے اور واقعے میں ملوث عناصر کو قانون کے کٹہرے میں لانے کے لیے کارروائیاں کی جا رہی ہیں۔
تاحال کسی گروہ نے اس حملے کی ذمہ داری قبول نہیں کی، جبکہ واقعے کی مزید تحقیقات جاری ہیں۔
