لاہور: الیکشن کمیشن آف پاکستان کے 42 رکنی زیر تربیت افسران کے وفد نے سنٹرل پولیس آفس لاہور کا مطالعاتی دورہ کیا، جہاں انہیں انتخابی سکیورٹی، جدید پولیسنگ اور عوامی خدمت سے متعلق مختلف امور پر تفصیلی بریفنگ دی گئی۔
وفد میں 39 اسسٹنٹ الیکشن کمشنرز، 2 ریسرچ ایسوسی ایٹس اور ایک اسسٹنٹ ڈائریکٹر شامل تھے۔ دورے کے دوران وفد نے انسپکٹر جنرل پولیس پنجاب عبدالکریم سے ملاقات بھی کی۔
اس موقع پر اے آئی جی آپریشنز سرفراز ورک نے عام اور ضمنی انتخابات کے دوران پنجاب پولیس کے سکیورٹی انتظامات، انتخابی عمل سے قبل اور بعد کی منصوبہ بندی، امن و امان کی صورتحال برقرار رکھنے کے اقدامات اور مختلف آپریشنل حکمت عملیوں پر تفصیلی بریفنگ دی۔
وفد کو پنجاب پولیس کے انفراسٹرکچر، جدید ٹیکنالوجی پر مبنی پولیسنگ، پبلک سروس ڈلیوری کے نظام اور ادارے میں متعارف کرائی گئی اصلاحات سے بھی آگاہ کیا گیا۔ زیر تربیت افسران نے سنٹرل پولیس آفس میں قائم پنجاب پولیس میوزیم، جدید کنٹرول روم اور دیگر اہم شعبہ جات کا بھی دورہ کیا۔
آئی جی پنجاب عبدالکریم نے وفد سے گفتگو کرتے ہوئے کہا کہ پنجاب پولیس انتخابی عمل میں الیکشن افسران کے کردار کو انتہائی اہمیت دیتی ہے اور ہر عام و ضمنی انتخاب کے دوران الیکشن افسران، پولنگ عملے اور انتخابی سرگرمیوں کے پرامن انعقاد کے لیے بھرپور سکیورٹی فراہم کرتی ہے۔
انہوں نے زیر تربیت افسران سے ان کی تربیت کے مختلف مراحل، تجربات اور مشاہدات کے بارے میں بھی دریافت کیا، جبکہ شرکاء کی جانب سے پوچھے گئے مختلف سوالات کے تفصیلی جوابات بھی دیے۔
دورے کے اختتام پر آئی جی پنجاب عبدالکریم اور الیکشن کمیشن کے وفد کے درمیان یادگاری سووینئرز کا تبادلہ کیا گیا۔
اس موقع پر ایڈیشنل آئی جی انویسٹی گیشن شہزادہ سلطان، ایڈیشنل آئی جی ٹریننگ عاصم گلزار، ڈی آئی جی ٹریننگ منیر احمد ضیا راؤ، ڈی آئی جی آئی ٹی منصور الحق اور پنجاب پولیس کے دیگر سینئر افسران بھی موجود تھے۔
