راولپنڈی: پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل نے آئی ایس پی آر سمر انٹرن شپ 2026 کے شرکاء سے خصوصی نشست میں قومی سلامتی، دہشت گردی، معلوماتی جنگ اور سوشل میڈیا کے ذمہ دارانہ استعمال سمیت مختلف اہم قومی امور پر تفصیلی گفتگو کی۔
آئی ایس پی آر کے مطابق خصوصی سیشن کے دوران ڈی جی آئی ایس پی آر نے طلبہ و طالبات کے سوالات کے مدلل اور مفصل جوابات دیے، جبکہ قومی سلامتی سے متعلق مختلف پہلوؤں پر آگاہی فراہم کی۔
بیان کے مطابق پاکستان بھر کے 21 مختلف اسٹیشنز پر جاری سمر انٹرن شپ 2026 میں 6 ہزار سے زائد طلبہ و طالبات شریک ہیں، جنہیں مختلف قومی، دفاعی اور سماجی موضوعات پر بریفنگ دی جا رہی ہے۔
شرکاء نے کہا کہ سیشن میں مس انفارمیشن، ڈس انفارمیشن، پروپیگنڈا اور غیر مصدقہ خبروں سے بچاؤ کے حوالے سے مؤثر رہنمائی فراہم کی گئی، جس سے ذمہ دارانہ انداز میں معلومات کے استعمال کی اہمیت کو بہتر طور پر سمجھنے میں مدد ملی۔
طلبہ و طالبات کے مطابق ڈی جی آئی ایس پی آر کی جامع اور معلوماتی گفتگو نے قومی سلامتی سے متعلق مختلف غلط فہمیوں اور ابہام کو دور کیا۔ انہوں نے کہا کہ آزاد جموں و کشمیر کی صورتحال، بھارتی پروپیگنڈے اور پاکستان کے مؤقف کے حوالے سے دی گئی بریفنگ نے زمینی حقائق کو سمجھنے میں مدد فراہم کی۔
شرکاء نے مزید کہا کہ فتنہ الہندوستان اور فتنہ الخوارج سے متعلق ڈی جی آئی ایس پی آر کی جانب سے پیش کیے گئے مؤقف اور معلومات سے مختلف سوالات کے جوابات ملے۔
سمر انٹرن شپ 2026 کے شرکاء نے درست اور مصدقہ معلومات کے فروغ، ذمہ دارانہ ڈیجیٹل رویے کو اپنانے اور ملک دشمن پروپیگنڈے کا مؤثر انداز میں مقابلہ کرنے کے عزم کا اظہار بھی کیا۔
