نائب وزیرِ اعظم اور وزیرِ خارجہ محمد اسحاق ڈار نے شنگھائی میں منعقدہ دستخطی تقریب کے دوران پاکستان کی جانب سے ورلڈ آرٹیفیشل انٹیلیجنس کوآپریشن آرگنائزیشن (WAICO) کے قیام کے معاہدے پر دستخط کر دیے، جس کے ساتھ ہی پاکستان اس تنظیم کے بانی اراکین میں شامل ہو گیا۔
ترجمان دفتر خارجہ کے مطابق، بانی رکن کی حیثیت سے پاکستان نے مصنوعی ذہانت (AI) کے شعبے میں، بالخصوص گلوبل ساؤتھ کے ممالک کے درمیان، بین الاقوامی تعاون کو فروغ دینے کے اپنے عزم کا اعادہ کیا۔
دفتر خارجہ نے کہا کہ پاکستان عالمی سطح پر مصنوعی ذہانت سے متعلق موجود تفاوت کو کم کرنے، جدید ٹیکنالوجی تک مساوی اور منصفانہ رسائی کو فروغ دینے اور اس شعبے میں ترقی پذیر ممالک کی استعداد کار بڑھانے کے لیے WAICO کے دیگر رکن ممالک کے ساتھ قریبی تعاون کا خواہاں ہے۔
ترجمان کے مطابق پاکستان کا مؤقف ہے کہ مصنوعی ذہانت تک منصفانہ رسائی عالمی ترقی، جدت، اقتصادی نمو اور مشترکہ خوشحالی کے فروغ میں اہم کردار ادا کر سکتی ہے۔
بیان میں مزید کہا گیا کہ پاکستان تنظیم کے رکن ممالک کے ساتھ مل کر مصنوعی ذہانت کے ذمہ دارانہ استعمال، علم کے تبادلے، ٹیکنالوجی کی منتقلی اور اختراعی منصوبوں کے فروغ کے لیے مشترکہ اقدامات کرے گا تاکہ تمام ممالک اس ابھرتی ہوئی ٹیکنالوجی سے یکساں طور پر مستفید ہو سکیں۔
یہ پیش رفت ایسے وقت میں سامنے آئی ہے جب دنیا بھر میں مصنوعی ذہانت کے شعبے میں بین الاقوامی تعاون، ضابطہ سازی اور جدید ٹیکنالوجی تک مساوی رسائی کو مستقبل کی پائیدار ترقی کے لیے انتہائی اہم قرار دیا جا رہا ہے۔
