کولمبو: سری لنکا کے شہر نیگومبو کی ایک جیل میں قیدیوں کے دو گروپوں کے درمیان ہونے والی خونریز جھڑپوں میں کم از کم 19 افراد ہلاک جبکہ 100 سے زائد زخمی ہو گئے ہیں۔
میڈیا رپورٹس کے مطابق جیل میں اتوار کے روز دو گروہوں کے درمیان تصادم شروع ہوا، جسے رات گئے سکیورٹی اہلکاروں نے قابو میں کر لیا تھا، تاہم پیر کے روز دونوں گروہوں کے درمیان ایک بار پھر شدید ہنگامہ آرائی اور جھڑپیں شروع ہو گئیں۔
حکام کے مطابق تازہ جھڑپوں میں مجموعی طور پر 19 افراد جان کی بازی ہار گئے، جن میں 4 جیل اہلکار اور 15 قیدی شامل ہیں۔
زخمیوں کو مختلف اسپتالوں میں منتقل
رپورٹس کے مطابق ہنگامہ آرائی کے دوران زخمی ہونے والے 100 سے زائد افراد کو فوری طور پر نیگومبو کے مقامی اسپتال منتقل کیا گیا، جبکہ شدید زخمی قیدیوں کو بہتر طبی سہولیات کی فراہمی کے لیے دارالحکومت کولمبو کے اسپتالوں میں منتقل کیا جا رہا ہے۔
طبی ذرائع کے مطابق متعدد زخمیوں کی حالت تشویشناک ہے، جس کے باعث ہلاکتوں میں اضافے کا خدشہ بھی ظاہر کیا جا رہا ہے۔
تحقیقات کا آغاز
سری لنکن حکام نے واقعے کے بعد جیل کی سکیورٹی مزید سخت کر دی ہے اور ہنگامہ آرائی کی وجوہات جاننے کے لیے باضابطہ تحقیقات شروع کر دی ہیں۔
ابتدائی اطلاعات کے مطابق جھڑپوں کی اصل وجہ قیدیوں کے دو گروہوں کے درمیان پرانا تنازع بتایا جا رہا ہے، تاہم حکام نے کہا ہے کہ تحقیقات مکمل ہونے کے بعد ہی واقعے کی اصل وجوہات سامنے آئیں گی۔
سکیورٹی ادارے اس بات کا بھی جائزہ لے رہے ہیں کہ آیا جیل انتظامیہ کی سکیورٹی میں کسی قسم کی کوتاہی اس واقعے کا سبب بنی یا نہیں۔
