واشنگٹن: فیفا ورلڈ کپ 2026 کے دوران امریکا میں مختلف قومی ٹیموں کے لیے سخت سیکیورٹی جانچ کا سلسلہ جاری ہے، جس کے دوران دفاعی چیمپئن ارجنٹائن کی ٹیم اور سپر اسٹار لیونل میسی کو بھی ایئرپورٹ پر تفصیلی سیکیورٹی اسکریننگ سے گزرنا پڑا۔
سوشل میڈیا پر گردش کرنے والی ویڈیوز میں دیکھا جا سکتا ہے کہ ارجنٹائن کے کھلاڑی پرواز سے قبل معمول سے زیادہ سخت سیکیورٹی مراحل سے گزرتے ہیں، جبکہ لیونل میسی اس صورتحال پر پہلے حیران دکھائی دیتے ہیں اور بعد ازاں مسکراتے ہوئے اپنے ساتھیوں کے ساتھ آگے بڑھ جاتے ہیں۔
ارجنٹائن کی ٹیم سے قبل بھی کئی دیگر قومی ٹیموں کو امریکی ایئرپورٹس پر اسی نوعیت کی سخت جانچ پڑتال کا سامنا کرنا پڑا۔ وائرل ویڈیوز میں سینیگال، ازبکستان اور جرمنی کی ٹیموں کو بھی مکمل سیکیورٹی اسکریننگ کے دوران دیکھا گیا، جہاں جدید اسکینرز، سراغ رساں کتوں اور اضافی حفاظتی اقدامات کا استعمال کیا گیا۔
رپورٹس کے مطابق سینیگال کی ٹیم کو ایئرپورٹ ٹرمینل میں داخل ہونے سے پہلے رن وے کے قریب سامان سمیت کھڑا رکھا گیا، جہاں امریکی سیکیورٹی اہلکاروں نے تمام کھلاڑیوں اور سامان کی تفصیلی جانچ کی۔
ازبکستان کی ٹیم کو بھی دوستانہ میچ کے لیے امریکا آمد پر جدید سیکیورٹی آلات اور تربیت یافتہ کتوں کے ذریعے چیک کیا گیا، جبکہ جرمن ٹیم کو کینیڈا روانگی سے قبل اضافی امیگریشن اور سیکیورٹی مراحل سے گزرنا پڑا۔
ادھر بعض رپورٹس میں یہ بھی بتایا گیا ہے کہ عراق اور ایران کی قومی ٹیموں کے چند ارکان کو امیگریشن کے دوران طویل پوچھ گچھ کا سامنا کرنا پڑا، جبکہ سپورٹ اسٹاف کے بعض افراد کو سفری دستاویزات سے متعلق مسائل کے باعث واپس بھیج دیا گیا۔
ارجنٹائن ٹیم کی سیکیورٹی جانچ کی ویڈیو سامنے آنے کے بعد سوشل میڈیا پر مختلف ردعمل دیکھنے میں آیا۔ متعدد صارفین نے حیرت کا اظہار کرتے ہوئے کہا کہ دنیا کے معروف فٹبالر لیونل میسی کو بھی عام مسافروں کی طرح سخت سیکیورٹی عمل سے گزرنا پڑا، جبکہ دیگر صارفین نے اسے امریکا کی یکساں سیکیورٹی پالیسی قرار دیا۔
ورلڈ کپ کے دوران امریکا میں غیر معمولی حفاظتی انتظامات کیے گئے ہیں اور تمام شریک ٹیموں، آفیشلز اور معاون عملے کے لیے یکساں سیکیورٹی پروٹوکول پر عمل کیا جا رہا ہے تاکہ ایونٹ کے دوران سیکیورٹی کو یقینی بنایا جا سکے۔
