وفاقی حکومت نے کاروباری سرگرمیوں میں سہولت فراہم کرنے کے لیے مارکیٹوں، دکانوں اور شاپنگ مالز کے اوقات کار میں توسیع کی منظوری دے دی ہے۔ یہ فیصلہ کفایت شعاری اقدامات کی نگرانی اور عملدرآمد کمیٹی کے اجلاس میں کیا گیا جس کی صدارت نائب وزیراعظم اور وزیر خارجہ اسحاق ڈار نے کی۔
اجلاس کے بعد جاری اعلامیے کے مطابق ملک بھر میں دکانیں، مارکیٹیں، شاپنگ مالز اور جنرل ریٹیل کاروبار اب رات 9 بجے تک کھلے رہ سکیں گے، جبکہ ریسٹورنٹس کو رات 11 بجے تک کاروبار جاری رکھنے کی اجازت دی گئی ہے۔ تاہم ٹیک اوے اور ہوم ڈیلیوری سروسز ان پابندیوں سے مستثنیٰ ہوں گی۔
اعلامیے میں کہا گیا ہے کہ شادی ہالز اور تقریباتی مقامات کے اوقات کار میں کوئی تبدیلی نہیں کی گئی اور وہ حسب سابق رات 10 بجے تک اپنی سرگرمیاں جاری رکھ سکیں گے۔
حکومت نے عوامی ضروریات کو مدنظر رکھتے ہوئے بعض شعبوں کو اوقات کار کی پابندی سے استثنیٰ بھی دیا ہے۔ فارمیسیز، اسپتال، پیٹرول پمپس، آئی ٹی اور ٹیلی کام سے متعلق ضروری خدمات فراہم کرنے والے ادارے نئے اوقات کار کے ضوابط کے پابند نہیں ہوں گے۔
کمیٹی نے صوبائی حکومتوں کو ہدایت کی ہے کہ وہ وفاقی اداروں کے تعاون سے نئے اوقات کار پر مؤثر عملدرآمد یقینی بنائیں تاکہ کاروباری سرگرمیوں اور توانائی کے استعمال کے درمیان متوازن نظام برقرار رکھا جا سکے۔
حکومتی حلقوں کے مطابق اس فیصلے کا مقصد کاروباری برادری کو سہولت فراہم کرنے کے ساتھ ساتھ معاشی سرگرمیوں کو فروغ دینا اور توانائی کے استعمال سے متعلق پالیسی میں توازن پیدا کرنا ہے۔
