لاہور میں آئندہ بلدیاتی انتخابات کی تیاریوں کے سلسلے میں ڈسٹرکٹ الیکشن کمیشن نے نئی حلقہ بندیوں کی ابتدائی فہرست جاری کر دی ہے، جس کے تحت شہر میں یونین کونسلز کی تعداد میں نمایاں اضافہ کیا گیا ہے۔
ابتدائی فہرست کے مطابق لاہور میں 159 نئی یونین کونسلز شامل کی گئی ہیں، جس کے بعد مجموعی تعداد 433 ہو گئی ہے۔ اس سے قبل 2015 کے بلدیاتی انتخابات کے دوران صوبائی دارالحکومت میں 274 یونین کونسلز قائم تھیں۔
جاری کردہ تفصیلات کے مطابق مختلف ٹاؤنز میں یونین کونسلز کی تقسیم بھی سامنے آ گئی ہے۔ راوی ٹاؤن میں 52، شالیمار ٹاؤن میں 72 اور واہگہ ٹاؤن میں 25 یونین کونسلز قائم کی گئی ہیں۔
اسی طرح ماڈل ٹاؤن میں 77، نشتر ٹاؤن میں 40، صدر کینٹ میں 29، رائے ونڈ سٹی میں 32، لاہور سٹی میں 69 جبکہ علامہ اقبال ٹاؤن میں 37 یونین کونسلز شامل کی گئی ہیں۔
الیکشن کمیشن کے مطابق شہری اور متعلقہ فریقین 23 جون تک نئی حلقہ بندیوں کے حوالے سے اپنے اعتراضات اور تجاویز جمع کرا سکتے ہیں۔ موصول ہونے والے اعتراضات کا جائزہ لینے کے بعد حلقہ بندیوں کی حتمی فہرست 10 اگست کو جاری کی جائے گی۔
حلقہ بندیوں میں اضافے کا مقصد آبادی میں اضافے اور انتظامی ضروریات کے مطابق بلدیاتی نمائندگی کو مزید مؤثر بنانا قرار دیا جا رہا ہے۔ نئی حلقہ بندیوں کے بعد لاہور میں بلدیاتی انتخابات کے انعقاد کی راہ مزید ہموار ہونے کی توقع ہے۔
