بحرین نے خطے میں بڑھتی ہوئی کشیدگی اور سیکیورٹی خدشات کے باعث اپنے شہریوں کے لیے ایران اور عراق کے سفر پر پابندی عائد کر دی ہے۔
بحرین کی وزارت داخلہ کی جانب سے دارالحکومت مناما میں جاری بیان کے مطابق حکومت نے قومی سلامتی اور شہریوں کے تحفظ کو یقینی بنانے کے لیے یہ اہم فیصلہ کیا ہے۔
وزارت داخلہ نے کہا کہ موجودہ علاقائی حالات اور کشیدہ سیکیورٹی صورتحال کے پیش نظر بحرینی شہریوں کے لیے ایران اور عراق کا سفر ممنوع قرار دیا گیا ہے۔ حکام نے شہریوں سے اپیل کی ہے کہ وہ سرکاری ہدایات پر عمل کریں اور کسی بھی غیر ضروری سفر سے گریز کریں۔
بیان میں مزید کہا گیا کہ حکومت خطے کی صورتحال کا مسلسل جائزہ لے رہی ہے اور شہریوں کی حفاظت کے لیے ضروری اقدامات جاری رکھے گی۔ وزارت داخلہ نے واضح کیا کہ یہ فیصلہ احتیاطی تدبیر کے طور پر کیا گیا ہے تاکہ ممکنہ خطرات سے شہریوں کو محفوظ رکھا جا سکے۔
تجزیہ کاروں کے مطابق مشرق وسطیٰ میں حالیہ کشیدگی، سیکیورٹی خدشات اور علاقائی تنازعات کے باعث متعدد ممالک اپنے شہریوں کے لیے سفری انتباہات اور پابندیاں جاری کر رہے ہیں، جبکہ بحرین کا یہ اقدام بھی اسی سلسلے کی ایک کڑی سمجھا جا رہا ہے۔
